عمران خان نا ضمنی گچین کاری تے ٹی بشخ ہلپننگ نا فیصلہ

اسلام آباد : تحریک انصاف نا چیئرمین و مسکوہی وزیراعظم عمران خان ضمنی گچین کاری تے ٹی بشخ ہلپننگ نا فیصلہ کرینے حوالی نا رد اٹ ضمنی گچین کاری تے ٹی پی ٹی آئی نا قومی اسمبلی نا مسکوہی باسک آک بشخ ہلیرہ‘ چیئرمین پی ٹی آئی قومی اسمبلی نا مسکوہی باسک آتے پندار کاغد جمع کرفنگ نا پرمان کرینے‘ حوالی نا رد اٹ عمران خان پارینے کہ قومی اسمبلی نا مسکوہی باسک آک تینا حلقہ غاتے ٹی گچین کاری مہم نابناءِ کیر‘ حوالی نا رد اٹ چیئرمین تحریک انصاف عمران خان ساڑی حالیت آتے مون آتخسا تینا فیصلہ ءِ بدل کرینے‘ یات سلے کہ الیکشن کمیشن 33 ضمنی گچین کاری تا حلقہ غاتے ٹی 16 مارچ آ گچین کاری شیڈول جاری کرینے‘ عمران خان تدوک آ دے قومی اسمبلی نا حلقہ این اے 193 آن ہم تینا پندار کاغد آتے پدی ہلکوسس۔ پاکستان تحریک انصاف وزیراعظم شہباز شریف ناکنڈآن اہم انگا قومی ویل آتیا 7 فروری آ بٹنگ انگوک آل پارٹیز کانفرنس اٹ بشخ ہلنگ آن نمن مسنے‘ پی ٹی آئی نا راہشون اسدعمر پارینے کہ دا بھاز بھلو راگ کننگ اٹی ءُ‘ تحریک انصاف نا لیڈر وسنگت آتے بندی کننگ انگءِ‘ تحریک انصاف نا چیئرمین ءِ نابود و دزگیر کننگ نا ہر وڑ انا کوشست کننگ انگءِ‘ دا کل اواری اٹ قوم ءِ ریفنگ نا کوشست کننگ اٹی ءُ کہ نن تو خوانہ کہ قوم اسیجا گام کے تو بایدے اوفک دا پاننگ آشکی مریر۔ ہندا الیکشن کمیشن قومی اسمبلی نا33 حلقہ غاتا ضمنی گچین کاری تا مہالو آن پڑو کرینے و بروک آ منہ دے اٹ قومی اسمبلی نا 23 آن باسک آتا گچین کاری نا پڑو ءِ ہم کیک۔ لاہور ہائی کورٹ ناپیشن آ شبلی فراز و وکیل آتتون میڈیا تون ہیت وگپ کرسا اسد عمر پارے کہ گچین کاری تا تاریخ نا بابت مسہ آپشن ارے کہ یا تو گورنر تاریخ ناپڑو کے یا دا پڑو ءِ الیکشن کمیشن کے، الیکشن کمیشن نوشت اٹ گورنر ءِ پارینے کہ 9 و 13 تاریخ نا نیام اٹ بایدے مرے تو اونا پوزیشن تون اسُل پیدوار ءِ۔

(مانیٹرنگ ڈیسک/ آن لائن)