امن ءِ لتاڑ کروک آک بلوچ آتا خیرخواہ افس، قدوس بزنجو

کوئٹہ : وزیراعلیٰ بلوچستان میر عبدالقدوس بزنجو پارینے کہ بلوچستان نا امن ءِ لتاڑ کروک آک بلوچ آتا خیرخواہ مننگ کپسہ ‘ دہشتگرد آک تہہ انا مریر یا پیشن نا سکیورٹی فورس آک اوفتے اوفتا ایسر اسکان سر کیرہ، حکومت بلوچستان سیکورٹی فورس آتتون سلوک ءِ و ہر فورم آرکھ ءِ کیک ‘ نوشکے ٹی 9دہشتگرد خلنگار وخت اس کہ پنجگور اٹ آپریشن برجاءِ، قومی میڈیا مس انفارمیشن تالان کپ ‘بلوچستان نیمہ پاکستان ءِ ‘ واقعہ غاک مریرہ تو بندغ آک بیرہ کوئٹہ سرپند مریرہ ‘ زند ومرک اللہ نا دوٹی ءِ ولے بلوچستان نا ویل آتے ایسر کننگ کن مذاکرات نا درگہ غاک آخریکو وخت اسکان ملوک مریرہ ‘ حکومت اٹ ہچ ءُ اختلاف اس اف جمہوری عمل اٹ سلاہ درشانی نا آجوئی کل انا حق ءِ ‘ ولے کل انا سوچ اسٹ مننگ کپک ‘3سال آن گوجالنگوک حکومتی و اپوزیشن حلقہ غاتے فنڈ تننگ انگ ءِ ‘ ننا زمواری ءِ کہ نن گڑاتے گچینی ناکنڈآ دین۔دا خیال آتادرشانی ءِ او جمعیت علماء اسلام (نظریاتی) نا دفترنا پیشن آ میڈیاتون ہیت وگپ کرسا کرے۔ داوخت آ جمعیت علماء اسلام نظریاتی نا مولاناعبدالقادر لونی، مولاناقاری مہراللہ، مولانا سید عبدالستار شاہ چشتی، ڈی آئی جی پولیس کوئٹہ سید فدا حسین شاہ وایلوفک ہم ساڑی ئسر۔ وزیراعلیٰ بلوچستان میرعبدالقدوس بزنجو پارے کہ جمعیت نظریاتی ناسرکڑدہ غاتا کنڈآن شرف تننگ آ اوفتا منت وار اٹ ‘ ہرا واقعہ مس او است ہسونی نا سوب ءِ نن اونا مذمت ءِ کینہ ‘ دا کل انا حکومت ءِ و الس ءِ رکھ تننگ حکومت نازمواری ءِ ‘ انسانی جانی نسخانک پورو مننگ کپسہ ولے ٹھپ آتے درمان کننگ مریک ‘ جمعیت نظریاتی دھرنا تننگ نا پڑو کرے ولے نن رابطہ کرین و اوفتا خواست آتے امنا کرسا اوفتیا عملدرآمد کن پرمان کرین۔ اوپارے کہ ننازمواری ءِ کہ نن گڑاتے گچینی ناکنڈآ دین ‘ اینو شہید آتا ایصال ثواب کن دعا پاتیہ کن بسٹ ‘ بلکہ اوفتا منت ءِ ہم ہرفوئی ئس کہ او بھاز زمواری نشان تسر۔ بلوچستان نا ویل آتے ہیت وگپ اٹ ایسر کننگ ناکوشست کینہ ‘ او پارے کہ نن ویل آتے ایسر کننگ کن تیار ان ہندا سوب آن سڑک آتیا بننگ کون آ روایت آک جوان افس ‘ ننا درگہ غاک ملوک ءُ نن 17سال آن بند کسر ءِ ملان، وی آئی پی روٹ ہم چٹانے ‘ شار تیا ہناٹ ولے روٹ خلتوٹ ‘ زند و مرک اللہ نادوٹی ءِ ‘ ولے نن خواپنہ کہ ننا سوب آن کس ءِ تکلیف مرے ‘ لس ٹریفک آنبار نن ہم کانہ ‘ نن شوغا کپنہ ولے اسہ کلہو اس کاہے کہ نن ہم مخلوق آنبار ان و ننا سوب آن کس اسے فریشانی مف۔

(آن لائن)