السی آسراتی تیکن عملی گام گیج کننگ ءِ اولیت تننگ انگ ءِ، جمال رئیسانی‘ ظفر زہری نا اوڑدہی

کوئٹہ، پاکستان پیپلز پارٹی نا قومی اسمبلی نا باسک نوابزادہ جمال خان رئیسانی تون بلوچستان اسمبلی نا باسک نوابزادہ میر ظفراللہ زہری سراوان ہاؤس کوئٹہ ٹی اوڑدہی کرے۔ اوڑدہی نا وخت آ بلوچستان نا مچ آ حالیت، ساڑی آ سیاسی حالیت و تین پہ تینی است خواہی نا چندی امور تیا سرجمی اٹ گپ وتران کننگا، دا وخت آ بلوچستان اٹ السی ویل، حلقہ غاتیٹی برجاامور و السی مفاد نا بابت باندات آتیا سجفنگا، قومی اسمبلی نا باسک نوابزادہ جمال خان رئیسانی پارے کہ بلوچستان نا الس ءِ مون تروک ویل آتا ایسر، السی آسراتی تیٹی گچینی و حلقہ غاتا شونداری کن عملی گام گیج آتے اولیت تننگ انگ ءِ۔ او پارے کہ السی نمائندہ غاتا زمواری ءِ کہ او تینا تینا علاقہ غاتا ویل آتے گچین وڑ اٹ تالان کرسا الس ءِ مون تروک مشکلات آتا ایسری کن ہر ممکن کڑد ادا کیر۔ اوڑدہی ٹی ہڑتوم آ راہشونک دا عزم نا درشانی ءِ کریر کہ السی ویل آتا ایسر و بلوچستان نا شونداری و شادکامی کن تین پہ تینی سلابت و رابطہ غاتا چرجوئی ءِ پین گچین وڑ اٹ برجاتخنگک۔