حرمین الشریفین مچ آ امت مسلمہ نا مقدس ہند ءِ،عبدالرحمان رفیق

کوئٹہ، جمعیت علماء اسلام ضلع کوئٹہ نا امیر مولانا عبدالرحمن رفیق، سیکرٹری جنرل حاجی عین اللہ شمس، سینئر نائب امیر مولانا خورشید احمد، مولانا محب اللہ، مولانا محمد ایوب، شیخ مولانا عبدالاحد محمدحسنی، مولانا سعید احمد، حافظ سراج الدین، مفتی محمد روزی خان بادیزئی، مولانا محمد شعیب جدون، رحیم الدین ایڈووکیٹ و مولانا محمد عارف شمشیر اسک پارینو کہ حرمین الشریفین مچ آ امتِ مسلمہ نا مقدس انگا ہند و مسلمان تا اسیجائی میرات آک ءُ، اوفتا حرمت و قدسیت نا رکھ ہر کلمہ گو مسلمان نا ایمان و دینی غیرت نا خواست ءِ‘ او پاریر کہ مکہ مکرمہ و مدینہ منورہ نا کنڈ آ خراب ہننگ و اوفتا قدسیت ءِ لتاڑنگ نا ہر کوشست مچ آ امت مسلمہ نا برخلاف گام گیج تکنگک‘ حرمین الشریفین نا امن، حرمت و قدسیت آ اسہ وڑ انا بیدادہم سگنگ مفک و مسلمانک تینا مقدس ہند آتا رکھ انا بابت مصلحت یا نزوری نشان تفسہ‘ او پاریر کہ مکرمہ و مدینہ منورہ غا جلہو نا ڈٹ بندی یا اونا مخ تفی کروک آتے امتِ مسلمہ نا خیرخواہ گوندنگ مفک‘ تاریخ شاہد ءِ کہ بیت اللہ نا حرمت ءِ لتاڑنگ نا ہر کس ہم کوشست کرے او تینا ایسر آن بچنگ کتو‘ اگہ اینو نا دور انا ابراہہ اس حرمین نا ڈغار نا کنڈ آ گام ہرفنگ یا بیدادی نا کسر ءِ ہرفے تو اودے تاریخ نا دا انجام آن سبخ دوئی کروئی تمک۔ جمعیت علماء اسلام ضلع کوئٹہ نا راہشونک پاریر کہ حرمین الشریفین نا امن و رکھ مچ آ امت مسلمہ نا اسیجائی زمواری ءِ و عالمِ اسلام ءِ مقدس ہند آتا رکھ، اوفتا حرمت نا پاسداری و ہر وڑ انا بیدادی ارادہ نا تورننگ کن اسہ توار و سیوت کرسا تینا دینی و ملی کڑد ءِ ادا کروئی تمک۔