چیف جسٹس تون سندھ بار کونسل نا ڈَل انا سلابتی اوڑدہی، مچ آ ملک اٹ عدالت آتیٹی ای فائلنگ نظام درستی راستی کرفنگ نا فیصلہ

اسلام آباد، کراچی، مچ آ ملک انا عدالت آتیٹی اسہ وڑ و پوسکنوڑ ای فائلنگ نظام درستی راستی کرفنگ کن چیف جسٹس آف پاکستان سندھ بار کونسل نا ڈل اتون سلابتی اوڑدہی کرے ہراٹی عدلیہ نا اصلاحات آ جم سجفنگا۔ چیف جسٹس آف پاکستان و چیئرمین نیشنل جوڈیشل پالیسی میکنگ کمیٹی جسٹس یحییٰ آفریدی سپریم کورٹ آف پاکستان، برانچ رجسٹری کراچی اٹی دا اوڑدہی چیف جسٹس سندھ ہائی کورٹ جسٹس ظفر احمد راجپوت تون اوار کرے۔ ڈل انا کماشیءِ سندھ بار کونسل نا وائس چیئرمین اشتیاق احمد میمن کرے۔ ڈل اٹی صوبہ نا جتا جتا ضلع غاتیان تعلقداروکیل و بار انا نا نمائندہ غاک اوار ئسر۔ اوڑدہی نا بنجائی مسخت سپریم کورٹ، ہائی کورٹ و ضلعی عدالت آتیکن اسہ اسٹ و آب اٹو قومی ای فائلنگ فریم ورک اس تیار کننگ ئس۔ بریفنگ اٹی پاننگا کہ سلاہی “نیشنل اسٹینڈرڈائزڈ ای فائلنگ سسٹم” اسہ منظم، صارف دوست و کانود نا رِداٹ پلیٹ فارم اس مریک ہرا عدالتی کارروائی نا کل کانودی گرج آتے پورو کیک۔ چیف جسٹس پارے کہ دا گام عدلیہ نا اصلاحاتی ایجنڈا نا اہم بشخ اسے ہرانا بنجائی مسخت ٹیکنالوجی نا کمک اٹ عدالتی کارروائی ءِ پوسکنوڑ جوڑ کننگ، شفافیت و کارکڑدءِ ودفنگ، پیش گوئی نا قابل نظام ترسا سوالی و وکیل آتیکن انصاف نا درگہ غا رسینگ گیگ ءِ آسان جوڑ کننگ ءِ۔ او دا ہیت آ زور شاغا کہ بار دا نظام نا بنجائی اسٹیک ہولڈر و صارف مننگ نا سوب آن آب اٹو ای فائلنگ ٹیمپلیٹس نا تیاری و نظام نا سرسہب نفاذ اٹی اہم کڑد ادا کے۔ اوڑدہی نا شریدار آتیان خواست کننگا کہ او عملی سلاہ پیش کیر تاکہ نظام ہر کہول آ کاریم اٹ اتنگ کن پورو وڑ اٹ آسان مرے‘ ڈل انا باسک آک دا گام انا ستاءِ کرسا اومیت درشان کریر کہ پوسکن آ نظام آسان فائلنگ نا وڑوڈول‘ کیس تا گچین ٹریکنگ و اسہ متحدہ الیکٹرانک کیس ریکارڈ نا جوڑ مننگ آن وکیل و سوالی ہڑتوم آتیکن آسودہی نا سوب مریک۔