بجٹ اٹ السی فائدہ نا کل بشخ آتے اہمیت تننگے، شہباز شریف

اسلام آباد : وزیرِاعظم شہباز شریف بروک آ مالی سال انا بجٹ نا شونداری ڈٹ آٹے ٹی ملکی درآمد آتا بدل گیگ فراوان کننگ‘ برآمد آتے ودفنگ و چندی بشخ آتا جدت نا ڈٹ آتے اولیت تننگ ناپرمان کرینے‘۔ وزیراعظم پارینے کہ بجٹ اٹ پی ایس ڈی پی ٹی ورنا تا شونداری کن خصوصی وڑ اٹ پیسہ جتا کننگے ورنا تا بڑزکو تعلیم کن پاکستان اینداؤمنٹ فنڈ جوڑ کننگ و مفت لیپ ٹاپ نا پروگرام ءِ اوار کننگے‘ پن بجلی نا ڈٹ وتوانائی نا بشخ انا پوسکنی کن بجٹ اٹ خصوصی پیسہ جتا کننگے۔ وزیرِاعظم شہباز شریف بنجائی بجٹ مالی سال 2023-24 اکن پبلک سیکٹر ڈویلپنٹ پروگرام کن سلابت نابابت اڈہلوک بڑکو کہولی دیوان ناکماشی ءِ کرے‘ دیوان ءِ پی ایس ڈی پی نا رد اٹ برجا ڈٹ آتیا پیش رفت و بروک آمالی سال اکن ڈٹ آتا بابت سلاہ تا بارو اٹ سرجم معلومدار کننگا۔ دیوان ءِ پاننگا کہ وزیراعظم نا پرمان آ بجٹ اٹ کشاری بشخ‘ قابل تجدید توانائی، ورناتیکن بڑزکو تعلیم‘ کسبی ہیلکاری و روزگار نا ڈٹ آک شونداری بجٹ نا اہم ءُ بشخ مریرہ‘ دیوان ءِ مستی پاننگا کہ آئی ٹی بشخ انا شونداری و برآمد آتے ودفنگ کن ہم ڈٹ آک بجٹ نابشخ مریرہ۔ داکان دیوان ءِ پاننگا کہ تدوک آمالی سال اٹ وزیراعظم نا کسان پیکیج وواکدار ورنا پروگرام نا فائدہ غاتے الس اسکان سر کننگا‘ دا بابت60 ہزار ورنا ءِ دا وخت آ چندی سرکاری شونداری ڈٹ آتے ٹی انٹرنشپ تننگ انگ ءِ وخت اس کہ خولم نا تدوک آ دَہ سال انا مون اٹ ریکارڈ پیداوار دوئی مس۔ دا وخت آ وزیراعظم پرمان کرے کہ بروک آ بجٹ اٹ پی ایس ڈی پی ٹی ورنا تا شونداری کن خصوصی وڑ اٹ پیسہ جتا کننگے بروک آ بجٹ اٹ ورنا تے بڑزکو تعلیم‘ کسبی ہیلکاری و شرفی روزگارنا وارخواہی فراوان کننگ کن گام گیج آتے اوار کننگے۔ وزیراعظم پارے کہ ورناتا بڑزکو تعلیم کن پاکستان اینداؤمنٹ فنڈ جوڑ کننگے۔ بجٹ اٹ لائخ و جوان کارکڑد نشان تروک مار ومسڑ طالب علم آتے آئی ٹی نا ہنر آن شپ کننگ کن مفت لیپ ٹاپ نا پروگرام ءِ اوار کننگے۔ اینڈاؤمنٹ فنڈ آن ورنا تے بڑزکو و کسبی تعلیم و آئی ٹی ٹی چاہنداری نا ہیلکاری تننگک۔وزیرِاعظم پرمان کرے کہ وظیفہ و تعلیم کن شفافیت و میرٹ ءِ اولیت تننگے۔ بجٹ اٹ آئی ٹی نا شونداری کن ڈٹ آتے اوار کننگے۔ کسان پیکیج نا رد اٹ بنا کروک ڈٹ آتے برجا تخنگے و توانائی نا قابل تجدید ڈٹ اوار کننگے‘ داڑتون اوار پن بجلی نا ڈٹ و توانائی نا بشخ انا پوسکنی کن بجٹ اٹ خصوصی پیسہ جتا کننگے۔ وزیرِاعظم پرمان کرے کہ ہمو ڈٹ ہرافک سست مرسا کیہی سال آن پی ایس ڈی پی ٹی اوار ءُ و اوفتا اہمیت سلتنے اوفتے کاریمی دنگ آن کشنگے۔ بجٹ اٹ شونداری ڈٹ آتے اوار کننگ نا وخت آ صوبہ‘ تعلقدار بشخ انا اسٹیک ہولڈر وسیوتی جماعت آتے پت اٹ ہلسا اوفتا سلاہ تے اوار کننگے۔ دیوان اٹ بنجائی وزیر اسحاق ڈار،خواجہ محمد آصف، احسن اقبال، رانا ثناء اللہ، رانا تنویر حسین، سلاہکار وزیرِاعظم احد خان چیمہ، خصوصی کمکار ملک احمد خان، عطاء اللہ تارڑ، جہانزیب خان وتعلقدار بڑزکو کمامدار آک ساڑی ئسر۔

(آن لائن)