صوبائی حکومت نا اسہ پیسہ اس ہم لیپس متنے، وزیر اعلیٰ بلوچستان

کوئٹہ (اے پی پی) وزیراعلیٰ بلوچستان جام کمال خان پارینے کہ صوبائی حکومت نا اسہ پیسہ اس ہم لیپس متنے ہراپیسہ غاک خڑچ مفس بروک آ سال ہموپیسہ غاک پدی بریرہ، اپوزیشن نا عدالت آتے ٹی کیس کننگ نا سوب آن حکومت نا 6تُو انا وخت زیان مس، 80ارب روپئی نا ریلیز آن داتم اسکان چندی علاقہ غاتے ٹی چِل ارب روپئی خڑچ کننگانے، محکمہ جان جوڑی ءِ اِرا بشخ آتے ٹی بشخنگ آن شاری تے گچین طبی آسراتی تا فراوانی ٹی آسانی مریک، ملازم آتا تنخواہ تے ودفنگ ویل انا ایسر اف، ننا حکومت غٹ بشخ آتا ملازم آتا ایسری کن کوشست کننگ ءِ و ملازم آتا 8آن 10الاؤنس آتیٹی ودکی کرینن، سرکاری ملازم آتا برانز نا وڑوڈول سہی الوکہ ہرافتے ایلوفک ہائی جیک کریر، صوبائی وزیر آبپاشی ءِ سندھ و پنجاب تون دیر انا ایسر نا چاری باندات آتے طے کننگ نا زمواری ءِ تسونن، صوبائی حکومت محکمہ غاتا گرج و الس نا است خواہی تے مون آ تخسا پی ایس ڈی پی جوڑ کیک۔ داخیال آتا درشانی ءِ او پنچ شنبے نادے آ سول سیکرٹریٹ کوئٹہ ٹی صحافی تتون غیررسمی گپ وتران کرسا کرے۔ داوخت آ صوبائی وزیر ظہور احمد بلیدی، انجینئر زمرک خان اچکزئی، سلیم خان کھوسہ، ملک نعیم خان بازئی، بشریٰ رند، چیف سیکرٹری مطہر نیاز رانا، سینیٹر دنیش کمار و ایلوفک ہم ساڑی ئسر۔