آئین و کانود نا رداٹ ویل آتا ایسر اس کشنگے، قمرالزمان کائرہ

اسلام آباد: وزیراعظم نا سلاہکار امور کشمیر، گلگت بلتستان قمر الزمان کائرہ پارینے کہ داوخت آ ملک اٹی ہیجانی کیفیت ودی کننگ انگ ءِ، آئین و کانود نا رداٹ ویل آتا ایسر اس کشنگے، ہرکنڈآن اسہ خواست ءِ کہ عدالت عظمیٰ دا باندات اٹی فل کورٹ اس جوڑ کے۔ او دوشنبے نادے آ سپریم کورٹ نا پیشن میڈیا تون گپ وتران کریکہ۔ سلاہکار امور کشمیر، گلگت بلتستان قمر الزمان کائرہ پارے کہ دا عدالتی فیصلہ تینا اثر آتے اِلک، مستین اٹ ہم عدالت آتون سیاسی و ایلومقدمہ غاک رسینگاسر۔ اینو پاکستان سیاسی، زرگزرانی و ایلو چیلنج آتون مون تننگ اٹی ءِ داٹی عدالتی چیلنج ہم مون تروک ءِ۔ اوپارے کہ داوخت آ ملک اٹی اسہ ہیجان اس ودی کرینو، داٹی بیرہ جوزہ غاتے بِننگک۔ عقل پدی سلک۔ داوخت آ گرج داہیت انا ءِ کہ ہیجان و جذباتی کیفیت آن پیشن پیش تمسا ساہ ہلین و حالیت آتا جاچ ءِ ہلین۔ اوپارے کہ نن پاکستان نا کانود و آئین آ عملدرآمد نا کمک اٹ ویل آتا ایسر اس کشن نئے کہ پین ویل ودی کین، دامستین اٹ ہم مرسا کرینے۔ قمرالزمان کائرہ پارے کہ بہرحال فیصلہ عدالت آتے ہی کروئی ءِ داوخت آ وکیل، سیاسی جماعت، میڈیا و عدالت آتا تہہ ٹی جج صاحب آتا کنڈآن ہم خواست ءِ کہ دا باندات آ فل کورٹ اس جوڑ کننگے۔ اوپارے کہ ننے ہڑدے پاننگک کہ سیاسی ویل آتا ایسر اس کشنگے، سیاسی جماعت آک بھلو کچ اسے ٹی اسٹ ءُ، سلابت اٹ فیصلہ مننگ ءِ ہنداخاطران ہراسٹ اوار تولپننگ ءِ اوفتا ہیت ءِ کننگے۔

(اے پی پی)