چھٹی نا دے عدالت ملنگا، عمران خان نا 7 اکتوبر اسکان ضمانت منظور

اسلام آباد: اسلام آباد ہائی کورٹ نیاڑی جج ءِ دھڑکو تننگ ناکیس اٹ عمران خان نا 7 اکتوبر اسکان عبوری ضمانت ءِ منظورکرے‘ عدالت پولیس ء ِ اودے دزگیر کننگ آن تورے وخت اس کہ عمران خان ءِ ٹرائل کورٹ اٹ پیش مننگ نا پرمان کرے۔ کیس انا سماعت ءِ جسٹس محسن اختر کیانی کرے‘ یک شنبے نادے پی ٹی آئی نا کانودی ٹیم انا رابطہ کننگ آ اسلام آباد ہائیکورٹ نا دائری برانچ ناکارندہ غاک دمدستی عدالت آ سر مسر ہراڑے عمران خان ناکنڈآن بابر اعوان ایڈووکیٹ دزگیری نا وارنٹ نا منسوخی و عبوری ضمانت کن درخواست دائر کرے‘ درخواست اٹ عمران خان موقف تینائی کرے کہ عمران خان نا برخلاف جج ءِ دھڑکو کیس اٹ بنائی وڑ اٹ دہشت گردی نا مقدمہ جوڑ کننگا‘ ہائی کورٹ دہشت گردی نا ٹک آتے چٹفے تو کیس اوکان ہنانے‘ مقدمہ نا مسخت عمران خان ءِ دزگیر کرسا پرامن سیاسی جہد آن توننگ ءِ‘ کیس درج کننگ نا اسٹ انگا مسخت کرپشن مافیانا برخلاف پرامن تحریک ءِ توننگ ءِ‘ انسداد دہشت گردی نا عدالت آن کیس انا منتقل مننگ آ ضمانت ہم مسترد مس۔ سیاسی مخالف حکومت بدنیتی اٹ تینا مسخت آتیکن دروغ نا مقدمہ اس جوڑ کرے۔ عمران خان نا آجوئی و جان ءِ خطرہ ءِ‘ ضمانت تننگے۔ اسلام آبادہائیکورٹ نا جسٹس محسن اختر کیانی عمران خان نا 7 اکتوبر اسکان عبوری ضمانت ءِ منظور کرسا دزگیری وارنٹ آ عملدرآمد ءِ تورے و عمران خان ءِ 7 اکتوبر آن مست ٹرائل کورٹ اٹ پیش مننگ نا پرمان کرے۔