شہید آک زمواری سر تس نا وخت آ ندر مسر، اسُل گیرام کپنہ ،صدر/وزیر اعظم

اسلام آباد، بشکیک، صدر آصف علی زرداری، وزیراعظم محمد شہباز شریف و بنجائی وزیرداخلہ محسن نقوی بلوچستان اٹی ‘آپریشن ردالفتنہ 3’ نا رِداٹ فتنہ الہندوستان و فتنہ الخوارج نا دہشت گرد آتا برخلاف سرسہب کارروائی تیا سیکورٹی فورسز آتے خراجِ تحسین و شہید آتے خراجِ عقیدت پیش کرینو۔ صدر آصف علی زرداری پارے کہ شہید آک زمواری سرتس ناوخت آ تینا جان تے ندر کرسا وطنِ عزیز نا رکھ نا اسہ شانی ءُ درور اس جوڑ کریر۔ وزیراعظم شہباز شریف پارے کہ ننا بہادر ورنا تا قربانیک ہچ ءُ وڑ اسے ٹی زیان مفسہ۔ وزیرداخلہ محسن نقوی پارے کہ شہید آتا دا بھلا قربانیک دہشت گردی نا برخلاف مچ آ قوم انا سوگو عزم انا شاہدی اٹی ءُ، و دہشت گرد و اوفتا کمکار آتے پورو وڑ اٹ چٹفنگ مچ آ قوم انا توار ءِ۔ اسہ بیان اٹی صدرِ مملکت آصف علی زرداری بلوچستان نا علاقہ چاغی و پشین اٹی 21 دہشت گرد ءِ دوزخی کننگ، کسٹمز ہاؤس آ دہشت گرد آتا جلہو ءِ بے سہب کننگ و کوئٹہ تفتان ہائی وے آ دہشت گرد آتا کنڈآن کانود آ چَپ چیک پوسٹ جوڑ کرسا طالب علم ومسافر آتا ہن وبر ءِ زہمی کننگ نا کوشست ءِ بے سہب کننگ آ سیکیرٹی فورسز آتاستاءِ کرے۔ صدرِ پاکستان فتنہ الہندوستان و فتنہ الخوارج نا دہشت گرد آتا برخلاف کارروائی آ سیکورٹی فورس آتا کسبی لائخی تا ستاءِ کرے۔ صدرِ مملکت دہشت گردی نا برخلاف کارروائی نا وخت آ اِرا افسر و کسٹمز نا اسہ کارندہ تون اوار 6 بہادر ورنا تا شہید مننگ آ ڈکھ و ارمان نا درشانی ءِ کرسا پارے کہ شہید آک زمواری تا سرتس نا وخت آ جان تے ندر کرسا وطن نارکھ اکن درور اس جوڑ کریر۔