سی پیک نا ارٹمیکو ریسہ غان فائدہ ہرفنگ کن پرائیویٹ بشخ ءِ مونی بروئی تمک،پروفیسر احسن اقبال

اسلام آباد، بنجائی وزیر ڈٹ بندی‘ شونداری و خصوصی گام گیج احسن اقبال سی پیک نا سال 2025ء آن 2029ء نا عملی ڈٹ آ عملدرآمد نا اولیکو سال انا پیش رفت نا جاچ ہلنگ کن دیوان ناکماشی ءِ کرے۔ دا عملی ڈٹ وزیراعظم محمد شہباز شریف نا اگست 2025ء اٹی دورہِ چین نا وخت آ پک مسوسس۔ دیوان اٹی عملی ڈٹ آ پیش رفت نا جاچ ءِ ہلسا پک مروک اولیت آتیا عملدرآمد ءِ پین ترند کننگ نا المی گام گیج آتیا سجفنگا۔ دیوان نا وخت آ احسن اقبال پارے کہ پاکستان و چین نا ایلمی تعلقداریک سختی نا حالیت آتے ٹی ہم مدام پین سوگو مسنو۔ او پارے کہ بھلا توانائی تنکی نا وخت آ چین پاکستان ءِ بھلو زرکاری اس فراوان کرے۔ سی پیک نا اولیکو ریسہ ٹی چین کساس 25 ارب امریکی ڈالر نا بھلا زرکاری کرے ہراڑان پاکستان نا بجلی پیداوار نا واکداری ٹی کساس 8000 میگاواٹ نا ودکی مس، ہرا توانائی تنکی نا توننگ و توانائی نا رکھ ءِ پک کننگ اٹی کمکار مس۔ او تھر انا کولانا کوڑی تا شونداری و فائبر آپٹک نیٹ ورک ءِ اولیکو ریسہ نا نمان سرسہبی گوندسا پارے کہ ارٹمیکو ریسہ ٹی ہندا بنداو آ واپاری شریداری‘ صنعتی ردوم، کشاری پوسکنوڑی‘ معدنیات، انسانی وسیلہ و ٹیکنالوجی نا بشخ آتے ٹی مونی دننگک۔ او پارے کہ سی پیک نا ارٹمیکو ریسہ نا اولیت ‘اڑان پاکستان’ نا پنچ بنداوی تمبہ غاتیٹی ہم اوار ءُ، ہرافتے ترقی، روزگار و زرکار‘ پوسکنوڑ‘ سوز زرگزران و تین پہ تینی حوال آتا پنچ راہداری نا کمک اٹ مونی دننگ انگ ءِ۔