پولیس نا کارروائی، برمتہ مروک ہفت سال نا چنا لاریب ءِ پدی ایسر
Get real time updates directly on you device, subscribe now.
کوئٹہ(آن لائن)ایڈیشنل انسپکٹرجنرل پولیس بلوچستان عبدالرزاق چیمہ پارینے کہ سی ٹی ڈی، سی آئی اے پولیس و ایلو ادارہ غاتا ٹیمک کارروائی کرسا 9 دے مُست ریلوے کالونی آن برمتہ مروک آ 7سال نا چُنا لاریب ءِ خنسا دوبہ دار محمدیوسف ءِ دزگیر کننگا۔ دوبہ دار مالو ہم چُناتے برمتہ ٹی اختہ ئس، پولیس کیس ءِ سائنٹفک وڑ اٹ ایسر کرینے۔ دا خیال آتا درشانی ءِ او برمتہ مروک آ چُنا لاریب، اونا باوہ سید رسول شاہ، پولیس کمامدار وزیر خان ناصر، ایس ایس پی کرائم برانچ اسدناصر و ایلوفتون پریس کانفرنس آن تران کرسا کرے۔ ایڈیشنل آئی جی پولیس عبدالرزاق چیمہ پارینے کہ ریلوے کالونی آن برمتہ مروک آ چُنا ءِ پولیس اونا لمہ باوہ نا دوٹی تسنے۔ 9 دے مُست ریلوے کالونی آن برمتہ مروک آ چُنا لاریب ءِ یلہ کرفسا برمتہ کروک آ دزگیر کننگانے، چُنا ءِ 24اگست آ سائیکل سوار اس اُرا نا ماس آن ہرفسا دریسُس، پولیس مقدمہ ءِ درج کرسا کارروائی ءِ شروع کریسُس۔