حکومت پوسکن گیگ توانائی نا بشخ اٹی زرکاری ءِ بخیر کیک،جام کمال خان

بنجائی وزیر واپار جام کمال خان پارینے کہ حکومت قابل تجدید توانائی، پوسکنوڑ ٹیکنالوجی و انفراسٹرکچر نا بشخ آتیٹی درملکی زرکاری ءِ بخیر کیک و زرکار آتیکن شفاف، سوگو و کاروباردوست چاگڑد نا فراوانی کن سنبرینگوک ءِ۔ ترجمان وزارت واپار نا رداٹ داخیال آتا درشانی ءِ او چارشنبے نادے آ کوریائی پاور کمپنی(KOEN)نا چیف ایگزیکٹو آفیسر کم من ینگ تون گپ وتران کرساکرے۔ اوڑدہی ٹی پاکستان نا ہائیڈرو پاور سیکٹر اٹی کوریائی زرکاری، سوات اٹی برجا پن بجلی ڈٹ و اوفتا پیش رفت آ گپ وتران کننگا۔ ڈل بنجائی وزیر ءِ پاکستان اٹ کمپنی نا زرکاری، برجاڈٹ و فنانسنگ بست وبند آتا بارواٹی حوال ترساپارے کہ کمپنی سوات اٹی 229 میگاواٹ اسریت کیڈم و 238 میگاواٹ کالام اسریت ہائیڈرو پاور ڈٹ آتیاکاریم کننگ ءِ۔ دا ڈٹ آتیکن کم و ود اسہ ارب امریکی ڈالر نا فنانسنگ نا بست وبند ہم کننگانے۔ بنجائی وزیرواپار پاکستان اٹ کوریائی پاور کمپنی (KOEN)نا پدریسہ است خواہی و زرکاری نا پت انا ستاءِ کرسا پارے کہ حکومت درملکی زرکارآتے ہروڑ انا آسراتی فراوان کننگ کن تعلقدار ادارہ غاتون پورو کمکاری ءِ پک کیک۔ اوکمپنی ءِ مون تروک باندات آتیا تعلقدار ادارہ غاتون رابطہ و گمانی کمکاری نا ہم باوری کرفے۔ داوخت آ کوریائی ڈل پاکستان حکومت تون پدریسہ رابطہ و کمکاری نا کمک اٹ ڈٹ آتیا پیش رفت نا اومیت نا درشانی ءِ کرے۔