صنعتی شونداری کن سازگار چاگڑد نا فراوانی ءِ حکومت اولیت ایتک، بلال کاکڑ

بلوچستان زرکاری بورڈ انا وائس چیئرمین بلال خان کاکڑ پارینے کہ وزیراعلیٰ بلوچستان میر سرفراز بگٹی نا وژن نا رداٹ صوبہ ٹی زرکاری، واپار، و صنعتی شونداری نا مون آدننگ کن سازگار چاگڑد نا فراوانی حکومت نا اولیت ءِ۔ ہندا وژن ءِ عملی دروشم تننگ کن بلوچستان زرکاری بورڈ، بیوٹمز نا شریداری اٹ بروک آ تُو جہانی آب انا بلوچستان انویسٹمنٹ اینڈ ٹریڈ ایکسپو اس اڈ ایتک، ہرا صوبہ نا زرگزرانی شونداری، زرکاری نا مون آ دننگ و ورناتیکن پوسکن آ روزگار و کاروباری وارخواہی ودی کننگ اٹ اہم مزل نا نشان جوڑمریک۔ اوداخیال آتا درشانی ءِ بیوٹمز اٹی اڈ ہلوک بلوچستان انویسٹمنٹ اینڈ ٹریڈ ایکسپو نا منشا کار طالب علم آتیان تران کرساکرے داوخت آ بلوچستان زرکاری بورڈ انا چیف ایگزیکٹو آفیسر قائم لاشاری، بیوٹمز نا پرووائس چانسلر ڈاکٹر میر وائس کاسی، رجسٹرار ڈاکٹر احسن اچکزئی، فیکلٹی باسک و طالب علم آتا بھلو کچ اس ہم ساڑی ئس۔ بلال خان کاکڑ پارے کہ زرکاری بشخ اٹی غٹ ورناتے ملازمت تننگ مفک ہنداسوب آن ورناک انٹرپرینیور شپ و کاروبار نا کنڈآ بریر، نن صوبہ نا یوتھ ءِ وارخواہی و ہیلکاری فراوان کینہ، اوپارے کہ حکومت بلوچستان زرکارآتے آسراتی فراوان کننگ، زرکاری نا عمل ءِ آسان جوڑ کننگ و پرائیویٹ بشخ انا است بڈی کن گچین گام گیج کننگ ءِ تانکہ ہندی و جہانی زرکاربلوچستان نا چندی بشخ آتیٹی پت اتون زرکاری کننگ کیر۔ اوپارے کہ بروک آ اڈ ہلوک آ بلوچستان انویسٹمنٹ اینڈ ٹریڈ ایکسپو ٹی ملکی و درملکی زرکار، کاروباری شخصیت، صنعتی ادارہ، شونداری شریدار، سفارتی نمائندہ، تعلیمی ادارہ و زند انا چندی بشخ آتیان تعلقدارآ چاہندار آک بشخ ہلیرہ۔ ایکسپو ٹی بلوچستان اٹی زرکاری نا وارخواہی، صنعتی بشخ، معدنی وسیلہ، کشاری و واپاری گمان، سیل و سوات و ایلو شونداری ڈٹ آتے گچین وڑاٹ تالان کننگک۔ اومنشاکار خوانوک آ مار و مسن تا کڑد انا ستاءِ کرساپارے کہ ورناک بھلا قومی و جہانی ایونٹ نا سرسہبی ٹی اہم حیثیت تخرہ۔ اوفتاتوانائی، کسبی لائخی و جوزہ دا ایونٹ ءِ سرسہب جوڑ کننگ اٹ اہم کڑد ادا کیک۔ بلال خان کاکڑ مستی پارے کہ حکومت بلوچستان ورناتے واکدار جوڑ کننگ، کاروباری سرجز آتے مون آ دننگ و زرکاری نا پوسکن وارخواہی ودی کننگ کن سنبرینگوک ءِ۔ داوخت آ پرووائس چانسلر ڈاکٹر میر وائس کاسی طالب علم آتیا زور شاغا کہ او دا ایکسپو نا سرسہبی ٹی تینا غٹ لائخی تے کاریم اٹ اتیر۔ بی بی او آئی ٹی نا سی ای او قائم لاشاری بلوچستان زرکاری بورڈ انا گرج و مسخت آتیا حوال تس وخت اس کہ ڈاکٹر احسن اچکزئی بلوچستان انویسٹمنٹ اینڈ ٹریڈ ایکسپو نا تیاری و منشاکار خوانوک آ مار ومسن تا کڑد آ ہیت کرے۔