پائلٹ آتا جعلی لیسن تے کینسل کننگ نا منظوری

اسلام آباد(آن لائن ) بنجائی کابینہ نا دیوان وزیر اعظم عمران خان نا کماش ٹی وزیر اعظم آفس اٹ اڈ ہلک ہراٹی 14 ٹِکی ایجنڈا تون اوار ایلو ویل آتیا ہم سجفنگا۔ حوال نا رداٹ کابینہ پی آئی اے پائلٹ آتا جعلی لیسن تا کینسلی نا منظوری ءِ ہم تس وخت اس کہ وزارت داخلہ نا کنڈآن غیر کانودی آ سلہہ غاتے لیسن تننگ نا ویل ءِ ہم رد کننگا۔ کابینہ عثمان ناصر ءِ ایم ڈی پاکستان سافٹ ویئر ایکسپورٹ بورڈ تعینات کننگ نا منظوری تس۔ ایس ای سی پی نا آڈٹ کن ہارورتھو حسین چوہدری کمپنی نا خمدت آتے دوئی کننگ نا ہم منظوری تننگانے۔ حوال نا ردات کابینہ مرغذار چڑیا گھر اسلام آباد نا انتظامی کنٹرول وزارت ماحولیاتی بدلی ءِ تننگ نا منظوری تس۔پارلیمنٹ نا باسک آتا شونداری اسکیم تا بابت قواعد آتیٹی بدلی نا منظوری تس۔ کابینہ دیوان اٹ اسٹاک ایکسچینج کراچی آ بے سہب آ جلہو نا معاملہ غا ہم ہیت وگپ کننگا۔ وزیر اعظم و کابینہ باسک آک جلہو ءِ بے سہب کروک آ سکیورٹی فورس وگارڈ آتے خراج تحسین پیش کرے وخت اس کہ شہید مروک آ سکیورٹی گارڈ و کارندہ غاتے ہم خراج عقیدت پیش کننگا۔ وخت اس کہ اوفتا درجہ غاتا بلندی کن ہم دعا کننگا۔ کابینہ نا باسک آتا پاننگ ئس کہ سکیورٹی کارندہ غاک تینا جان تے ندر کرسا ملک ءِ بھلو دہشت گردی سے آن بچفیر او مچ آ قوم سکیورٹی فورس آتے سلام پیش کیک۔ حوال نا رداٹ بنجائی کابینہ ایمپلائز اولڈ ایج بینفٹ انسٹی ٹیوشنز نا پنش تیٹی 2000 ودکی نا منظوری ہم تس او داسہ ای او بی آئی نا پنشن ہلوک آتے 6500 نا جاگہ غا 8500 پنشن تننگک۔ وزیر اعظم نا خاص انگا کمکار زلفی بخاری و ہمو کمامدار آک پنشن نا ودکی نا ویل آ بریفنگ تس۔2000 ودکی نا سفارش ءِ وزارت اوورسیز کریسُس ہرادے کابینہ ٹی منظور کننگا۔ بجٹ منظور مننگ آ کابینہ نا باسک آک وزیر اعظم ءِ مبارکبادی تسر۔