مچ آ دنیا ٹی کوروناوائرس آن زہمی بندغ آتا کچ اسہ کروڑ پنچ لکھ آن گدرینگا

واشنگٹن/لندن (اے پی پی) مچ آ دنیا ٹی کوروناوائرس آن زہمی بندغ آتا کچ اسہ کروڑ پنچ لکھ آن گدرینگانے وخت اس کہ داتم اسکان دا ہلوک آ وائرس آن پنچ لکھ 14 ہزار آن زیات بندغ زوال کرینو۔ چارشنبے نادے آ امریکی ذرائع ابلاغ نا رداٹ دنیا ٹی دین آن غٹ آن زیات زہمی مروک آ ملک امریکہ ءِ ہراڑے 27 لکھ آن زیات بندغ کوروناوائرس آن زہمی مسنو وخت اس کہ ملک اٹی داتم اسکان اسہ لکھ 30 ہزار آن زیات بندغ زوال کرینو۔ کوروناوائرس نا تالانی مچ آ دنیا ٹی ترندی اٹ برجاءِ ، دنیا نا چندی ملک آتے ٹی 1،05،90،724 بندغ داڑان زہمی مسنو۔ داتم اسکان 5،14،020بندغ دا دین انا سوب زوال کرینو۔ دنیا ٹی کورونانا فعال ناجوڑ آتا کچ 42،78،434 ءِ۔ امریکہ ٹی کوروناوائرس آن زہمی بندغ آتا کچ 27،27،853ءِ ، ملک اٹی پک فعال ناجوڑ آتا کچ 14،54،397اسکان سرمسنے۔ امریکی کمامدار آتا پاننگ ءِ کہ مچ آ ملک اٹی داتم اسکان کوروناوائرس آن 130122بندغ زوال کرینو۔ کوروناوائرس آن زیات زہمی گڑاس ملک آتے ٹی سخت لاک ڈاون نا سوب آن پک زہمی و مرک آتا کچ کم مننگ بناکرینے۔ ولے داسہ ہم چندی ملک آتے ٹی کورونانا تالانی ٹی ودکی مننگ ءِ۔ ساڑی آ ہفتہ غاتے ٹی برازیل، میکسیکو، بھارت، سویلی افریقہ، و کولمبیا ٹی زہمی و مرک آتے ٹی ودکی مسنے۔ کوروناغان برازیل اٹی داتم اسکان 59،656 ، برطانیہ ٹی 43،730، فرانس اٹی 29،843، میکسیکو ٹی 27،769 ، ایران اٹی 10،817 و کینیڈا ٹی 8،591بندغ زوال کرینو۔