حکومت تون مذاکرات مس ہم تو ای تولپرہ، عمران خان

لاہور: چیئرمین پاکستان تحریک انصاف عمران خان پارینے کہ ای حکومت تون مذاکرات اٹ تولپرہ‘ اگہ ہیت وگپ مس تو پارٹی نا ایلو باسک آک کیرہ‘عدلیہ غا جلہو ءِ توننگ کن مچ آ قوم ءِ اسٹ مروئی مریک‘ دا رد اٹ مران خان آئین نا بالادستی و عدلیہ تون سلنگ کن پارٹی راہشون تے سیاسی جماعت و سول سوسائٹی تون رابطہ غاتا ٹاسک تس۔ حوال نا رد اٹ عمران خان تون زمان پارک لاہور اٹ سندھ اسمبلی ٹی اپوزیشن لیڈر حلیم عادل شیخ ومسکوہی گورنر سندھ عمران اسماعیل اوڑدہی کریر ہراٹی ملکی سیاسی حالیت‘ گچین کاری تا باندات آ سپریم کورٹ اٹ سماعت مروک کیس اناباندات آ گپ وتران کننگا‘ حوالی نا رد اٹ دا وخت آ عمران خان پارٹی راہشون تے رول آف لاء و آئین نا بالادستی کن کل سیاسی جماعت و سول سوسائٹی تون رابطہ غاتا ٹاسک ترساپارے کہ ساڑی حالیت آتے ٹی عدلیہ غا جلہو مننگ اٹی ءِ ہرادے توننگ کن مچ آ قوم ءِ اسٹ مروئی مریک‘ ہرا سیاسی جماعت آک آئین نا بالادستی کن جہد کننگ خوارہ کل اتون رابطہ کننگے‘ دا بابت میڈیا تون ہیت وگپ اٹ سندھ اسمبلی اٹ اپوزیشن لیڈر حلیم عادل شیخ پارے کہ ننے زمواری تننگانے‘ سیاسی جماعت آتتون رابطہ کننگک انتئے کہ آئین نا بالادستی و رول آف لاء کن مچ آ قوم ءِ اسٹ مروئی مریک ہراڑکن سندھ انا سیاسی، مذہبی، قوم پرست جماعت و سول سوسائٹی تون ہم رابطہ کینہ‘ تدوک آ نن قوم آن تینا تران اٹ پاکستان تحریک انصاف نا چیئرمین عمران خان پارے کہ کنے خطرہ ارے کہ دا اکتوبر اٹ ہم گچین کاری کرفپسہ‘ داخوارہ کہ عمران خان جیل اٹ مرے یا نابود ولدا گچین کاری کرفنہ‘ کنے پاننگے اکتوبر اٹ گچین کاری تیان پاکستان ءِ انت مریک؟ آئین 90 دے اٹ گچین کاری کرفنگ کن کلیئر ءِ، 90 دے آن پد نگران حکومت نا حیثیت انت مریک؟ سپریم کورٹ اٹ انت کہ مننگ اٹی ءِ دا بابت قوم ءِ تیار کننگ خواوہ‘ قوم انا زند داسہ فیصلہ کننگ نا وخت ءِ‘ قوم ءِ کانود و آئین تون سلوئی مریک۔ او پارے کہ نن 90 دے اٹ گچین کاری تا بابت آئین نا ٹک ءِ ہُرسا تینا حکومت ءِ چٹفین‘ 90 دے آن پیش تمنگ بھاز خطرناک ءِ انتئے کہ داکان مست ہم دا قوم ءِ 90 دے اناپارسا یانزدہ سال حکومت کننگا‘ اکتوبر اٹ انتئے‘؟ اکتوبر اٹ حالیت آک زیات خراب مننگ کیرہ و پیسہ نا زیات کمتی مننگ کیک‘ گڑا داسہ واکدار آک پک کیرہ کہ آئین نا ہرا ٹک ءِ کاریم اٹ اتوئی ءِ و ہرادے آخا؟۔ داکان بیدس عمران خان اسہ درملکی ٹی وی چینل اسے انٹرویو ٹی پارینے کہ ہرافتے دز وکرپٹ پاوہ اوفتتون مذاکرات کن تولپرہ‘ اگہ ہیت وگپ مس تو پارٹی نا ایلو باسک آک کیرہ‘ دا وخت آ ملک اٹ کل آن بھلا ویل 90 دے اٹ گچین کاریک ءُ‘ داسہ گچین کاریک متوس تو اکتوبر اٹ گمان تا بھاز کم ءِ۔ عمران خان پارے کہ اگہ مذاکرات مس تو بیرہ گچین کاری تا باندات آ مریک‘گچین کاری تا کنڈ آ ہننگتو تو گڑا مذاکرات نا ہچ ءُ فائدہ اس مفک‘ ای کس اتون رابطہ کتنٹ ولے گچین کاری تیا ہیت وگپ کننگ کن تیار اٹ‘اوپارے کہ تینا فائدہ کن سپریم کورٹ ءِ بشخنگنواز شریف نا متکن ءُ وڑ اسے‘ سپریم کورٹ نا فیصلہ ءِ منپننگ نامطلب دادے کہ ملک اٹ آئین وکانود چٹانے ولے مچ آقوم سپریم کورٹ تون سلوک ءِ۔ 2018 نا گچین کاری تے ٹی ننا نشست آتے رزاکا کم کننگا تاکہ کنٹرول کننگ مرے۔ عمران خان دا ہم دعویٰ کرے کہ ننے دا ہم سماءِ کہ ننا بندغ آتے دیر درینے‘او پارے کہ پی ڈی ایم ناکنڈآن سپریم کورٹ نا مسہ باسکی بنچ انا فیصلہ ءِ منپننگ نا پڑو آ تنقید کرے و پارے کہ ننا جماعت عدالت عظمی تون سلوک ءِ۔

(آن لائن)