سورینج شکست نا ہرزہمی خاہوت کن پنچ لکھ روپئی کمک نا پڑو

کمکار وزیراعلیٰ بلوچستان حوالکاری و سیاسی باندات شاہد رند پارینے کہ سورینج اٹی کولا کانڑ انا است ہسون شکست اٹی زوال مروک کارندہ غاتا خاہوت آتیکن وزیراعلیٰ بلوچستان میر سرفراز بگٹی پنچ پنچ لکھ روپئی مالی کمک نا پڑو کرینے، شاہد رند پارے کہ زوال مروک کارندہ غاتا لاش تے اوفتا باوہ پیرہ ئی آ علاقہ غاتسکان شرف اٹ سر کننگ کن کل المی بست و بند آتے پورو کننگانے تانکہ زہمی خاہوت آتے آسراتی تننگ مرے، او پارے کہ محکمہ مائنز اینڈ منرلز، پی ڈی ایم اے، ریسکیو 1122 و ایلو تعلقدار ادارہ غاتا ٹیمک شکست نا جاگہ غا ریسکیو و کمکی کاریم تے ٹی اختہ ءُ و کل تعلقدار ادارہ غاک تین پہ تینی رابطہ نا کمک اٹ حالیت آتا پدریسہ چاروکی ءِ کننگ ءُ، کمکار وزیراعلیٰ پارے کہ حکومت بلوچستان دا است ہسون شکست آ ماتنی خاہوت آتا ڈکھیائی ٹی بریبر نا شریدار ءِ و زہمی خاہوت آتے وس انا کمک و آسراتی رسیفنگک۔ او پارے کہ وزیراعلیٰ بلوچستان میر سرفراز بگٹی تعلقدار کمامدار آتے پارت کرینے کہ کمکی کاریم تے ٹی ہچ ءُ ڈیوالئی اس کننگپ وزہمی خاہوت آتا دمدستی کمک ءِ پک کننگے۔