شیخ رشید نا کمنٹ اونا کماش آتا پت ءِ پاش کیک،لشکری رئیسانی

 کوئٹہ( پ ر) بلوچستان نیشنل پارٹی نا بنجائی راہشون نوابزادہ حاجی میر لشکری خان رئیسانی پارینے کہ شیخ رشید آنبار انگا اہم انگا درباری نا سردار اختر مینگل نا بابت بیان اونا کماش آتا پت ءِ پاش کیک۔ اونا دا رویہ اسہ بندغ یا قبیلہ سے نا برخلاف اف بلکن بلوچستان نا ہر شعور نا خواجہ سیاسی کارندہ و قبائلی راہشون نا برخلاف ءِ، ہرانا ورندی ءِ سیوتی واکداری و سیاسی عمل اٹ ایتنہ۔ تدوک آ نن نجی ٹی وی تون ہیت وگپ کرسا نوابزادہ حاجی میر لشکری خان رئیسانی مستی پارینے کہ کیہی وار گچین مروک آ شیخ رشید ہرانا حیثیت ہروخت اسہ اہم ءُ درباری سے نا مسنے۔ اونا سردار اختر جان مینگل و صوبہ نا متبر آ قبیلہ نا بابت بیان نفرت کڑزک۔ او پارینے کہ او سردار اختر مینگل و اونا قبیلہ نا بابت ہرا لوز آتے کاریم اٹ ایسنے داڑان نئے بیرہ اونا کماشی ءِ کروک آتا پت پاش مریک بلکن اونا تہٹی ڈکوک آ بلوچستان نا برخلاف ساڑی بدبیسئیک ہم پاش مسنے۔ او پارینے کہ دا بیان آن صوبہ نا بندغ آتے کساس مسنے کہ اسہ خاص وڑ اٹ سجفوک آ بندغ آک بلوچستان نا بندغ آتے ہرا نظریہ ٹی ہررہ و تکرہ۔