دیوالی مہر، ایلمداری امن نا کلہو ایتک، سرفراز بگٹی

کوئٹہ، وزیراعلیٰ بلوچستان میر سرفراز بگٹی ہندو برادری ءِ دیوالی آ دلی مبارکبادی پیش کرسا پارینے کہ دیوالی مہر، ایلمداری، امن و روشنائی تا زیباءُ کلہو اس ایتک۔ دن انگا تہوار آک راج اٹی تین پہ تینی شرف، رواداری و جتا جتا مذہب آتتون تعلقدار بندغ آتا نیام اٹ ہم گرنچی ءِ شون تننگ نا کمک مریرہ‘ تینا اسہ کلہو اسے ٹی وزیراعلیٰ پارے کہ پاکستان اٹی رہینگوک کل اقلیتی برادریک قومی راج نا اہم ءُ بشخ اسے ءُ و ملکی تعمیر و شونداری ٹی اوفتا خذمت آک ستا کڑزرہ۔ ہندو برادری ہم پاکستان نا شونداری، شونہالی و زندگی نا چندی بشخ آتیٹی نمان کڑد ادا کرینے، ہرافتے شرف تننگک۔ میر سرفراز بگٹی پارے کہ بین المذاہب ہم گرنچی، مذہبی رواداری و تین پہ تینی شرف اسہ پرامن و سوگو ءُ راج اسے نا بنداوی قدر آک ءُ۔