علامہ اقبالؒ نا فکر و فلسفہ اینو ہم قوم اکن فکری راہشونی نا بن چکل ءِ،ڈاکٹر ربابہ خان بلیدی

کوئٹہ، سلاہکار محکمہ زالبول شونداری بلوچستان، ڈاکٹر ربابہ خان بلیدی (ستارہ امتیاز) یومِ اقبال نا وخت آ تینا خصوصی کلہو اٹی پارینے کہ شاعرِ مشرق علامہ محمد اقبالؒ نا فکر و فلسفہ اینو ہم قوم اکن فکری راہشونی و قومی شونداری نا روشنا بن چکل ءِ۔ اقبالؒ خودی، علم، کردار، تینے آ پتداری و پدریسہ جہد انا کمک اٹ اسہ باشعور، شرفمند و وتواجہ ءُ قوم اسے نا ٹہیفنگ نا سبخ تس۔ ڈاکٹر ربابہ خان بلیدی پارے کہ علامہ اقبالؒ ورنا چین ءِ تینا لائخی تیا پت تخنگ، بڑزکو مسخت تا دوئی کننگ و علم و جاست پاست نا پڑ اٹی مونی ہننگ نا پارے۔ اونا فکر ننے دا سبخ ایتک کہ قوم آتا شونداری نا اصل راز تعلیم، مثبت سوچ، سوگو کردار و عملی جہد اٹی اودیم ءِ۔ او پارے کہ اقبالؒ نا تصورِ خودی و قومی بیداری ٹی نیاڑی تا تعلیم، ہیلکاری و راجی کڑد ءِ ہم بنداوی اہمیت دوئی ءِ۔ اسہ خوانندہ، باشعور و واکدار نیاڑی نئے بیرہ سوگو خاہوت بلکہ شونہال راج اسے نا ٹہیفنگ اٹ ہم اہم کڑد ادا کیک۔ ڈاکٹر ربابہ خان بلیدی مستی پارے کہ بلوچستان نا نیاڑی و ورنا چین ءِ تعلیم، ہنر، جاست پاست و پوسکن آ خوسات آتتون ہم گرنچ وارخواہی فراوان کننگ وخت انا اہم ءُ گرج اسےِ۔ اقبالؒ نا فکر انا رد اٹ نیاڑی تا لائخی تے کاریم اٹ اتسا صوبہ و ملک انا راجی و زرگزرانی شونداری ءِ پوسکن ءُ کسر اس تننگ مریک‘ او پارے کہ علامہ اقبالؒ نا کلہو اسہ دور یا نسل اسکان کچ اٹ سلپک بلکہ بروک آ نسل تیکن ہم علم، سیوت، خودداری و قومی خذمت نا آخبتی سبخ ءِ۔ اسہ سوگو، شونہال و شون ہلوک پاکستان اسے نا تفنگ کن اقبالؒ نا فکر ءِ تعلیمی، راجی و عملی زند انا بشخ جوڑ کننگ المی ءِ۔