تربت شار اٹی بھلا و مال ہرفوک آ گاڈی تا پترینگ نا موکل تننگپک، تابش علی بلوچ

تربت، ڈپٹی کمشنر کیچ یاسر اقبال دشتی نا پارت آ ایڈیشنل ڈپٹی کمشنر کیچ تابش علی بلوچ نا کماشی ٹی سوزی منڈی نا تربت شار آن کیبی علاقہ سری کہن آ گدریفنگ تون تعلقدار اسہ اہم ءُ دیوان اس اڈ ہلک۔ دیوان اٹی اسسٹنٹ کمشنر تربت محمد حنیف کبزئی، چیف آفیسر میونسپل کارپوریشن تربت شعیب ناصر، سیکرٹری مارکیٹ کمیٹی محبوب علی، ایگریکلچر آفیسر چاکر علی، ایس ڈی او واپڈا عبدالحلیم، سینیٹری انسپکٹر حبیب جالب، سوزی منڈی نا دکاندار غلام رسول و فضل الرحمن، انجمن تاجران کیچ نا حاجی کریم بخش و ایس آئی آسمی بجار تون اوار ایلو تعلقدار بندغ آک ساڑی ئسر۔ دیوان آن تران کرسا ایڈیشنل ڈپٹی کمشنر کیچ تابش علی بلوچ پارے کہ سری کہن اٹی میونسپل کارپوریشن تربت نا کنڈ آن سوزی منڈی نا ماڑی تیار کننگانے ہندا سوب آن تربت شار اٹی جوڑ کل سوزی منڈی تا مالک آک تینا دکان و کاروبار ءِ زوت آن زوت پوسکن آ سوزی منڈی سری کہن آ گدریفر۔ او پارے کہ تربت شار اٹی ٹریفک نا نظام ءِ گچین جوڑ کننگ، شاری تے ہن و بر اٹی آسراتی فراوان کننگ و بھلا مال ہرفوک آ گاڈی تا سوب آن ودی مروک آ ویل آتا مون ءِ توننگ کن شار اٹی بھلا گاڈی تا پترینگ نا موکل تننگپک، دا رد اٹ سوزی منڈی نا گدریفنگ المی ءِ تاکہ شار اٹی ٹریفک نا روانی ءِ برجا تخنگ تون اوار شاری ویل آتے ہم گچین وڑ اٹ ایسر کننگ مرے۔ دا وخت آ اسسٹنٹ کمشنر تربت محمد حنیف کبزئی و چیف آفیسر میونسپل کارپوریشن تربت شعیب ناصر ہم دیوان آن تران کرسا سوزی منڈی نا گدریفنگ نا اہمیت آ زور شاغا و دکاندار تیا پیدوار کریر کہ شار اٹی ٹریفک نا گچینی و انتظامی باندات آتے بھرمی جوڑ کننگ کن پوسکن آ سوزی منڈی ءِ فعال کننگ المی ءِ۔ دیوان اٹ سوزی منڈی نا دکاندار تا نمائندہ غاک ہم تینا موقف نا درشانی ءِ کریر، اوفک گدریفنگ نا بست وبند آتے پورو کننگ و واپاری باندات آتے پوسکن آ جاگہ غا گدریفنگ کن انتظامیہ غان شش تُو انا موکل نا خواست کریر و باور کرفیر کہ او دا رد اٹ انتظامیہ تون پورو کمک کیرہ و سوزی منڈی ءِ تربت شار آن سری کہن آ گدریفنگ کن المی گام گیج کیرہ۔ دیوان اٹی انتظامیہ نا کنڈ آن دکاندار آتے سوزی منڈی نا گدریفنگ کن شش تُو انا موکل تننگ نا فیصلہ کننگا، انتظامیہ پیدوار کرے کہ پک وخت انا پورو مننگ آن پد پارت آتیا عملدرآمد کپروک آتا برخلاف سخت کانودی کارروائی کننگک۔ انتظامیہ دا ارادگی نا درشانی ءِ کرے کہ تربت شار اٹی ٹریفک نا روانی ءِ گچین جوڑ کننگ، شاری نظم و ضبط برجا تخنگ و الس ءِ مون تروک ویل آتا ایسری کن کل المی گام گیج آک کننگرہ وخت اس کہ تعلقدار ادارہ غاک دا عمل ءِ سرسہب جوڑ کننگ کن تین پہ تینی کمکاری اٹ کاریم کیرہ۔