خیبر پختونخوا ٹی مدامگی امن و سوگوی کن بنجا نا کمک المی ءِ،گورنر فیصل کریم کنڈی

پشاور، خیبرپختونخوا نا گورنر فیصل کریم کنڈی پارینے کہ خیبرپختونخوا ٹی مدامگی امن و سوگوی کن بنجا نا کمک المی ءِ، صوبہ غان دہشتگرد، اوفتا کمکار و مالی کمک کروک آتا چٹفنگ ننا اولیکو اولیت ءِ۔ او وزیراعظم شہباز شریف نا کماشی ٹی گورنر ہاؤس پشاور اٹی اپیکس کمیٹی نا بھاز اہم انگا دیوان آن تران کرسا کرے۔ اپیکس کمیٹی نا دیوان اٹی نائب وزیراعظم اسحاق ڈار اتون اوار بنجائی وزیر و بڑزکو عسکری سرکڑدہ غاک بشخ ہلکر۔ وزیراعظم شہباز شریف ءِ اپیکس کمیٹی نا دیوان اٹی 12 ضلع ایمرجنسی نا نفاذ آ جم بریفنگ تننگا۔ خصوصی دیوان نا وخت آ خیبرپختونخوا نا امن کن قربانی تروک شہید آتے گچین لوز آتے ٹی خراجِ عقیدت پیش کننگا۔ اپیکس کمیٹی نا دیوان اٹی گورنر خیبرپختونخوا فیصل کریم کنڈی پیدوار کرے کہ صوبہ ٹی امن نا برجائی ننا اولیکو اولیت ءِ و خیبرپختونخوا نا الس امن خواہک، فوج، ایف سی و پولیس خیبرپختونخوا ٹی امن کن نہادی آ جان تے ندر کریر‘ خیبرپختونخوا ٹی مدامگی امن و سوگوی کن بنجا نا کمک المی ءِ۔ گورنر فیصل کریم کنڈی پارے کہ پاکستان نا کل ادارہ غاک اگہ اسہ جاگہ غا مریر تو امن و شونداری نا عمل ءِ توننگ مننگ کپک، صوبہ غان دہشتگرد، اوفتا کمکار و و مالی کمک تروک آتا چٹفنگ ننا اولیکو اولیت ءِ، خیبرپختونخوا ٹی ویل آتا ایسری کن قابلِ عمل حکمت عملی ٹہیفنگ ننا مسخت ءِ، خیبرپختونخوا ٹی امن و سوگوی کن بنجا نا کمک نا منتواری ءِ ہرفنہ۔ گورنر فیصل کریم کنڈی پارے کہ صوبہ ٹی ہندن ءُ چاگڑد اس خواہنہ ہراڑے ہر شاری تینے رکھوک و شونداری نا عمل نا بشخ سرپند مرے، خیبرپختونخوا ءِ امن، سوگوی، شونداری و شونہالی نا مثالی ءُ صوبہ اس جوڑ کروئی ءِ، السی رکھ و شونہالی کن بنجا و صوبہ نا نیام اٹی کمکاری المی ءِ۔