نیاڑی تا آسراتی کن لیڈیز کلب بلوچستان نا ٹہیفنگ ستا کڑزوک ءُ گام اسے،جعفرخان مندوخیل

کوئٹہ، گورنر بلوچستان جعفرخان مندوخیل پارینے کہ لیڈیز کلب بلوچستان نا جوڑ کننگ ستاکڑزوک ءُ گام اسےِ ہراڑان زالبول آتا زرگزرانی و راجی سرجز آتے شون رسینگک‘ و اوفتے تینا حق و زمواری تون تعلقدار آگاہی ودی کننگ نا وارخواہی دوئی مریک‘ دا رد اٹ المی ءِ کہ لیڈیز کلب بلوچستان ءِ ایلو تعلقدار سرکاری و غیرسرکاری ادارہ، راجی تنظیم و ڈونر آتتون جوان رابطہ کننگے تاکہ زالبول آتا آسراتی و آسودہی‘ ہنرمندی نا شون تننگ و روزگار نا وارخواہی ودی کننگ کن اسیجائی ڈٹ آتا بناءِ کننگ مرے۔ گورنر مندوخیل لیڈیز کلب بلوچستان ءِ فعال و جوان جوڑ کننگ کن تینا پبی کمکاری نا باوری کرفسا پارے کہ زالبول تیکن روزگار نا وارخواہی ودی کننگ و اوفتا زرگزرانی و راجی شونداری تون تعلقدار گام گیج آتا است بڈی کننگک۔ دا خیال آتا درشانی ءِ او گورنر ہاؤس کوئٹہ ٹی ستارہ محمدحسنی نا کماشی ٹی زالبول آتا اسہ ڈَل اسے تون اوڑدہی نا وخت آ کرے‘ ڈَل اٹی صوبائی اسمبلی نا مسکوہی باسک زینت شاہوانی، روبینہ ابراہیم زہری، مہوش رند، انزلہ بلوچ و عائشہ ضیاء قلندرانی اوار ئسر۔ ڈَل گورنر بلوچستان ءِ لیڈیز کلب بلوچستان نا مسخت و سلائی سرجز آتیان معلومدار کرے و دا اومیت نا درشانی ءِ کرے کہ کلب زالبول آتے مثبت راجی سرجز، کسبی رابطہ، ہنرمندی نا شون تننگ و آسودہی ڈٹ آتیٹی بشخ ہلنگ کن اسہ گچین ءُ پلیٹ فارم اس فراوان کیک‘ دا وخت آ گورنر بلوچستان جعفرخان مندوخیل زالبول تا زرگزرانی وتواجہی، راجی شونداری و صوبہ نا تعمیر و شونداری ٹی اوفتا گچین کڑدار ءِ پین سوگو کننگ کن تین پہ تینی کمکاری نا اہمیت آ ہم زور شاغا۔ گورنر مندوخیل پارے کہ زالبول آتے مون تروک ویل آتا ایسری، اوفتا حق آتا رکھ و شونداری نا بریبری نا وارخواہی تا فراوانی کن اسیجائی توار چست کننگ المی ءِ تاکہ جم کوشست آتا کمک اٹ اٹ پین جوان و مدامگی بھرم دوئی کننگ مرے۔