خیبر پختونخوا، بنجائی حکومت تون ایمرجنسی آن بیدس ہچ ءُ کسر اس بچتویسس،نائب وزیر اعظم

اسلام آباد، نائب وزیراعظم و وزیر خارجہ اسحاق ڈار پارینے کہ دہشت گردی ڈیہہ و دنیا اکن کل آن بھلا چیلنج ءِ، پاکستان دا جنگ اٹی 90 ہزار آن زیات جان تا قربانی تس و بے درور بہادری و استقامت نا داستان نوشتہ کرے۔ خیبرپختونخوا ٹی ایمرجنسی خلنگ آسان الو، بنجائی حکومت تون ایمرجنسی آن بیدس ہچ ءُ کسر اس سلتویسس‘ دھرناو برانز تا سوب آن زرگزران ءِ بھاز نسخان مریک۔ اسلام آباد اٹی سیمینار آن تران کرسا اسحاق ڈار پارے کہ دہشت گردی نا برخلاف جنگ انا سوب آن پاکستان نا زرگزران ءِ بھاز نسخان مس۔ دنیا ءِ دہشت گردی نا برخلاف جنگ اٹی پاکستان نا قربانی تا امنائی ءِ کروئی تمک۔ پاکستان ءِ سانحہ جعفر ایکسپریس تون اوار بلوچستان اٹی مزور تا برمتہ و اوفتا شہادت کون آ واقعہ غاتتون ہم مون تروئی تما۔ او پارے کہ وزیراعظم شہباز شریف نا کماشی ٹی دہشت گردی نا چٹفنگ کن پوسکن آ کسر تیا کاریم بنا کننگانے و کانود نافذ کروک ادارہ غاک دا ناچوڑ نا چٹفنگ کن دے و نن کوشست کننگ ءُ۔ دہشت گردی نا برخلاف جنگ اٹی ہر صوبہ ءِ تینا کڑد ءِ ادا کروئی تمک۔ او پارے کہ خیبرپختونخوا ٹی ایمرجنسی خلنگ آسان الو۔ بنجائی حکومت تون ایمرجنسی آن بیدس ہچ ءُ کسر اس بچتویسس۔ نائب وزیراعظم پارے کہ فیلڈ مارشل عاصم منیر دہشت گردی نا چٹفنگ کن سنبرینگوک ءِ و اونا پارت آ ہڑدے نا کاٹم آ دہشت گرد تا برخلاف آپریشن کننگ انگ ءِ۔ اسحاق ڈار پارے کہ پاکستان اوغان کمامدار آتیا پدریسہ زور شاغسا بسنے کہ او تینا ڈغار ءِ دہشت گردی کن کاریم اٹ اتنگ کن الیپ۔ دا باندات آ گپ و تران کن اوغانستان نا دورہ غاک ہم کننگار، وخت اس کہ پاکستان نا اوغانستان آن بیرہ ہندا خواست ءِ کہ او تینا ڈغار ءِ دہشت گردی کن کاریم اٹ اتنگ کن الیپ۔ او پارے کہ اگست 2025ء اٹی کابل اٹی پاکستان، چین و اوغانستان نا نیام اٹی سہ فریقی دیوان مسوسس، ولے بدبختی اٹ دہشت گردی نا باندات آ اوغان کمامدار آک تینا قول تے پورو کننگ کتوس۔