اوغانستان اٹی ٹی ٹی پی نا 6 ہزار آن زیات دہشت گرد اریر،عطاء اللہ تارڑ

اسلام آباد، بنجائی وزیر حوالکاری و شینکاری عطاء اللہ تارڑ پارینے کہ پاکستان دہشت گردی نا برخلاف جنگ اٹی دنیا نا پین ملک اسے نا مون اٹ نمان قربانی تسنے و دا جنگ اٹ 100 ارب ڈالر آن زیات نا زرگزرانی نسخان ہرفینے۔ دہشت گردی نا برخلاف جہد کرسا نئے بیرہ تینا الس بلکہ جہانی برادری نا رکھ اٹی ہم اہم کڑد ادا کرینے، ولے ملک ءِ داسہ ہم دہشت گردی و انتہا پسندی کون آ بھلا چیلنج آتتون مون تروئی تمک۔ دہشت گردی تور انا بدل مروک ڈیک آ اڈ ہلوک آ کانفرنس آن تران کرسا عطاء اللہ تارڑ پارے کہ پاکستان ڈیہہ اٹی امن و سوگوی کن پورو کڑد ادا کرے و امریکہ و ایران نا نیام اٹی خیرخواہی ٹی ہم تینا کڑد ءِ ادا کرے۔ او پارے کہ اسہ پرامن و سوگو اوغانستان پاکستان تون اوار مچ آ ڈیہہ انا فائدہ ٹی ءِ۔ بنجائی وزیر حوالکاری پارے کہ پاکستان کیہی جہانی فورم تیا اوغان رجیم آن دہشت گردی نا چٹفنگ کن جوان کڑد ادا کننگ نا خواست کرسا بسنے۔ او پارے کہ اوغانستان اٹی 20 ہزار آن زیات دہشت گرد ساڑی ءُ، ہرافتے ٹی کالعدم تحریک طالبان پاکستان (ٹی ٹی پی) نا 6 ہزار آن زیات دہشت گرد ہم اوار ءُ۔ او دعویٰ کرے کہ دہشت گرد آک اوغان ڈغار آ رکھوک ہند آتیٹی ساڑی ءُ و ہموڑے وڑ وڑ انا ہیلکاری دوئی کننگ اٹی ءُ۔ عطاء اللہ تارڑ پارے کہ پاکستان تدوک آ چار دہائی آن کساس 40 لکھ اوغان مہاجر نا مہمانداری ءِ کرے و اوغان الس کن پاکستانی قوم انا مہمانداری و مہر دنیا نا مون آٹے۔ او پیدوار کرے کہ پاکستان اوغانستان اٹی انتہا پسندی و شدت پسندی نا چٹفنگ ءِ خواہک، انتئے کہ ڈیہہ اٹی مدامگی امن کن دہشت گردی نا توننگ المی ءِ۔ بنجائی وزیر خیبرپختونخوا نا الس ءِ محب وطن گوندسا پارے کہ دہشت گردی نا برخلاف جنگ اٹی الس نا قربانی و کڑد ءِ گوجالنگ مفک۔ او دا ہیت آ زور شاغا کہ دہشت گردی نا بدل مروک گڑتی تتون مون تننگ کن گچین گام گیج و ڈیہہ تا نیام اٹ کمکاری المی ءُ۔