پاکستان نا زرگزران برجا مالی سال 4 درسد آن زیات شون ہلیک،وزیر خزانہ محمد اورنگزیب

اسلام آباد ڈ بنجائی وزیر خزانہ محمد اورنگزیب اومیت درشان کرینے کہ پاکستان نا زرگزران برجا مالی سال 4 درسد آن زیات شون ہلیک،خت اس کہ حکومت 5 آن 6 سرکاری ادارہ غاتا پرائیویٹائزیشن ناکمک اٹ اسہ ارب ڈالر آن زیات دوئی کننگ نا ہدف تخک۔ کشاری بشخ گچین کارکڑدنشان تننگ اٹی ءِ‘ ولے نیامی دے ٹک اٹی چک و تاڑ و جہانی منڈی ٹی تیل انا بڑزکو نہاد آک ملکی زرگزران کن گڑتی ودی کننگ کیرہ۔ حکومت کبینی و جہانی جنس تا نہاد آتیٹی ودکی نا زہم تیا پدریسہ نظر تخانے۔ برطانوی خبر رساں ادارہ تون ہیت کرسا وزیر خزانہ پارے کہ پاکستان اٹی تیل انا بھلو کچ اس ارے‘ و حکومت ملک اٹی تیل انا کاختی آن بچنگ اٹی سرسہب مسنے۔ او پارے کہ جہانی حالیت آتا سوب آن ودی مروک زرگزرانی گڑتی تیان پد ہم زرگزرانی شونداری نا ترندی ءِ برجا تخنگ نا کوشست آک برجا ءُ۔ محمد اورنگزیب پارے کہ حکومت پرائیویٹائزیشن نا عمل اٹی پیشرفت نا اومیت تخک، وخت اس کہ کساس 12 سرکاری ادارہ پرائیویٹائزیشن نا پائپ لائن اٹی اوار ءُ۔ برجا ریسہ ٹی 5 آن 6 ادارہ تا پرائیویٹائزیشن آن اسہ ارب ڈالر آن زیات کٹیا دوئی کننگ نا ہدف پک کننگانے۔ صوبہ غاتیٹی بجلی نا بشخ و پانٹ کروک کمپنی تا پرائیویٹائزیشن و بالی اڈہ غاتا آپریشنز آؤٹ سورس کننگ ہم اوار ءِ۔ او پارے کہ حکومت ملکی زرگزران اٹی پرائیویٹ بشخ ءِ سرکڑدہی کڑد تننگ خواہک و سرکاری ادارہ غاتا پرائیویٹائزیشن ہندا پالیسی نا بشخ ءِ۔ او پرائیویٹائزیشن نا عمل ءِ آئی ایم ایف تون پک کروک اصلاحاتی قول آتیا عملدرآمد نا اسہ اہم ءُ امتحان اس گوندا۔ امریکہ تون 10 ارب ڈالر نا ایکسچینج اسٹیبلائزیشن فیسلٹی نا حوالہ ترسا ہیت کرسا محمد اورنگزیب پارے کہ دا مالی آسراتی نا دوئی کننگ کن مذاکرات برجا ءُ۔ دا آسراتی پاکستان کن بھلو کمک اس مننگ کیک، ولے مذاکرات پورو مننگ کن ہچ ءُ پک وخت اس تننگ مننگ کپک۔ او پیدوار کرے کہ اگہ دا آسراتی دوئی متو ہم تو پاکستان نا مارکیٹ اسکان رسینگ گیگ زہمی مفک۔ وزیر خزانہ پارے کہ پاکستان و جہانی مالیاتی فنڈ (آئی ایم ایف) نا نیام اٹی اسٹاف لیول معاہدہ پک مسنے‘ ہرانا رد اٹ کساس 1.21 ارب ڈالر نا مالی کمک رسینگ نا اومیت ارے۔ داٹی ایکسٹینڈڈ فنڈ فیسلٹی (ای ایف ایف) و موسمیاتی بدلی تون تعلقدار پروگرام نا رد اٹ کمک اوار ءِ۔ او مستی پارے کہ پاکستان نا زرگزران ءِ پیشن نا مالی کمک، زرکوڑی برجا تخنگ و وام تا تننگ کن پدریسہ مالی وسیلہ درکار ءُ۔ حکومت نا کوشست ءِ کہ زرگزرانی سوگوی تون اوار شونداری نا ترندی برجا تخنگے و پرائیویٹائزیشن تون اوار اصلاحاتی گام گیج آتا کمک اٹ ملکی زرگزران ءِ سوگو بنداو تیا سلفنگے۔