صدر و بنجائی کابینہ نا منظوری آن وزیراعظم نا فیصلہ،خیبرپختونخوا ٹی ایمرجنسی و گورنر راج نافذ، گورنر فیصل کریم کنڈی صوبہ نا کنٹرول ءِ دوئی کرے

اسلام آباد، صدر مملکت آصف علی زرداری بنجائی کابینہ نا منظوری آن پد وزیراعظم شہباز شریف نا ایڈوائس آ خیبرپختونخوا ٹی آئین نا آرٹیکل 232(1) و آرٹیکل 234(1) نا رِد اٹ ایمرجنسی و گورنر راج نافذ کرینے، ہراڑان پد صوبائی وزیراعلیٰ و اونا کابینہ ءِ اینک کننگانے و گورنر فیصل کریم کنڈی صوبہ نا کنٹرول ءِ دوئی کرینے‘ صدرِ مملکت بنجائی کابینہ نا سلاہ تا منظوری ءِ تسنے، ہراکان پد صوبہ نا انتظامی کنٹرول و صوبائی حکومت نا واکداری گورنر آ گدریفنگانے‘ آئین نا آرٹیکل 232 نا رِد اٹ ملک انا امن و وایمنی‘ تہہ انا چک و تاڑ و سیکورٹی حالیت تا سوب آن ایمرجنسی نافذ مننگ کیک، وخت اس کہ آرٹیکل 234 صوبہ ٹی آئینی مشینری نا بے سہبی و آئینی پرمان تیا عمل کپننگ آ گورنر راج انا واکداری فراوان کیک۔ دا فیصلہ تون اوار وزیراعلیٰ، صوبائی کابینہ و صوبائی باسک آک تینا ساڑی عہدہ و واکداری تیان فارغ مسنو و صوبہ نا حکومت داسہ بنجا نا نمائندگی ٹی چلیفنگک۔ صدرِ پاکستان خیبرپختونخوا ٹی آئینِ پاکستان نا آرٹیکل 232 نا رِد اٹ ایمرجنسی نافذ کننگ نا فیصلہ کرے و خیبرپختونخوا ٹی دہشت گردی نا ودوک آ واقعہ غاتے و امن و وایمنی نا خراب حالیت آتے مون آ تخسا ایمرجنسی نا پڑو کننگانے۔ صدارتی پڑو نا رِد اٹ دہشت گردی نا واقعہ غاتیٹی بھاز ودکی آن الس نا جان و مال ءِ بھاز گڑتی مون تروک ءُ، سرکاری میرات‘ بنداوی پنجر و کانود نافذ کروک ادارہ غاتیا دہشت گرد جلہو آتیٹی ودکی مسنے، صوبائی حکومت دہشت گردی و کانود آن چَپ کاریم تے توننگ کن درکار ارادگی و گام گیج کننگ اٹی بے سہب مس۔ پڑو نا رِد اٹ گورنر خیبرپختونخوا نا رپورٹ اٹی صوبہ ٹی آئینی نظام نا تعطل و صوبائی حکومت نا آئین نا رِد اٹ کاریم کننگ کپننگ نا نشاندہی کننگاسس۔ صدرِ مملکت آصف علی زرداری خیبرپختونخوا ٹی سنگین ایمرجنسی نا حالیت آتے مون آ تخسا دمدستی آئینی گام گیج ءِ المی گوندا و صدارتی پڑو آئین نا آرٹیکل 232(1) و آرٹیکل 234(1) نا رِد اٹ جاری کننگا۔ اعلامیہ نا رِد اٹ ایمرجنسی نا نفاذ تون اوار پڑو کننگانے کہ صوبائی حکومت ساڑی حالیت آتیٹی آئین نا رِد اٹ چلیفنگ کپک۔ بنجائی حکومت گورنر خیبرپختونخوا ءِ صوبائی حکومت نا کل یا منہ باندات آتے تینا واکداری ٹی ہلنگ نا پارت تننگ کیک۔ گورنر خیبرپختونخوا بنجائی حکومت نا کنڈ آن تروک صوبائی حکومتی باندات آتے سر تننگ کیک۔ صوبائی اسمبلی آن بیدس صوبہ نا ایلو ادارہ و کمامدار آتا کل یا منہ واکداری تے بنجائی حکومت نا پارت آ گورنر کاریم اٹ اتنگ کیک۔ خیبرپختونخوا اسمبلی نا واکداری تے پارلیمان یا اونا واکداری نا رد اٹ کاریم اٹ اتنگک۔ وزیراعلیٰ، صوبائی وزیر‘ سلاہکار‘ خصوصی کمکار و ایڈووکیٹ جنرل تینا عہدہ غاتے دمدستی وڑ اٹ یلہ کیر۔ صدارتی پڑو دمدستی وڑ اٹ نافذ العمل مریک۔