خیبرپختونخوا حکومت دہشت گردی نا توننگ نا جاگہ غا ملک دشمنی کرے،وزیراعظم شہباز شریف

اسلام آباد، بنجائی کابینہ خیبرپختونخوا ٹی ایمرجنسی و گورنر راج نافذ کننگ نا منظوری ءِ تسنے وخت اس کہ وزیراعظم شہباز شریف پارینے کہ دہشت گردی نا چٹفنگ کن ننا ارادگی نزور مفروک ءِ، اوغان ڈغار نا پاکستان نا برخلاف دہشت گردی کن کاریم اٹ اتنگ ءِ اسُل منپنہ، خیبرپختونخوا حکومت دہشت گردی نا توننگ نا جاگہ غا چُپ تولوک راگ ہُراکہ‘ دہشت گردی آ چُپ مننگ ملک دشمنی آنبار ءِ، پاکستان ءِ بیوس مننگ کن الیپنہ، کانود تینا کسر ءِ دوئی کیک، دہشت گردی نا واقعہ غاتیان خن تے چَپ کرسا او اسلام آباد آ جلہو نا ڈٹ جوڑ کریسس۔ وزیراعظم سعودی عرب آ حوثی تا جلہو نا سخت مذمت ءِ کرسا سعودی عرب تون پورو یکجہتی نا درشانی ءِ کرسا پارے کہ سعودی عرب نا برخلاف اسہ وڑانا بیدادی ءِ ہم سگپنہ‘ مکہ مکرمہ و مدینہ منورہ نا رکھ ہر مسلمان نا ایمان نا بشخ ءِ، نیامی دے ٹِک اٹی بدبختی اٹ اسہ وار ولدا حالیت آک چک و تاڑ نا گواچی مسنو، امن کن سفارتی کوشست آتیٹی فیلڈ مارشل سید عاصم منیر نا اہم کڑد مسنے‘ وزیراعظم محمد شہباز شریف نا کماشی ٹی اڈ ہلوک دیوان اٹی بنجائی کابینہ خیبرپختونخوا ٹی ایمرجنسی نا نفاذ نا سلاہ ترسا پارے کہ وزیراعظم سلاہ ایتے کہ حالیت آتا خرابی ءِ مون آ تخسا صدر آئینی واکداری ءِ کاریم اٹ اتسا صوبہ خیبرپختونخوا ٹی آئین پاکستان نا آرٹیکل 232 و 234 نا رِد اٹ ایمرجنسی نا نفاذ ءِ کے۔ بنجائی کابینہ ءِ خیبرپختونخوا ٹی امن و ایمنی نا حالیت و دہشت گردی نا خراب مروک حالیت آتیا بریفنگ تننگا۔ کابینہ خیبرپختونخوا ٹی امن وایمنی نا خراب مروک حالیت و دہشت گردی نا برخلاف جنگ آن صوبائی حکومت نا ارادتاً بے تعلقی ءِ مون آ تخسا حالیت آتا جم جاچ ءِ ہلک۔ کابینہ وزیرِ اعظم ءِ سلاہ تس کہ او صدرِ مملکت ءِ سلاہ ایتے کہ حالیت آتا خرابی ءِ مون آ تخسا صدرِ مملکت آئینی واکداری ءِ کاریم اٹ اتسا صوبہ خیبرپختونخوا ٹی آئینِ پاکستان نا آرٹیکل 232 و 234 نا رِد اٹ ایمرجنسی نفاذ کے۔ بنجائی کابینہ نا دیوان اٹ تران کرسا وزیراعظم محمد شہباز شریف پارے کہ آئی ایم ایف تون اسٹاف لیول معاہدہ مسنے، نیویارک اٹی ایم ڈی آئی ایم ایف تون مثبت گپ و تران مس، ایم ڈی آئی ایم ایف پاکستان نا زرگزرانی سوگوی نا کوشست آتے امنا کرے، ایم ڈی آئی ایم ایف پارے کہ زرگزرانی سوگوی نا کوشست آک پاکستان اٹی اہم بدلی ءُ، اقتصادی شونداری و شونہالی کن ٹیم ورک انا وڑ اٹ کاریم کرینن، چیلنج آتا مون ءِ توننگ کن دے و نن کوشست کننگ اٹی اُن‘ زرگزرانی اصلاحات کن حکومتی کوشست آتے امنا کننگانے‘ جہانی کہول آ پاکستان نا سفارت کاری ءِ شرف ایتنہ‘ وزیراعظم پارے کہ نیامی دے ٹِک اٹی بدبختی اٹ اسہ وار ولدا حالیت آک چک و تاڑ نا گواچی مسنو، امن کن سفارتی کوشست آتیٹی فیلڈ مارشل سید عاصم منیر نا اہم کڑد مسنے‘ نائب وزیراعظم اسحاق ڈار، وزیر داخلہ محسن نقوی و مچ آ ٹیم انا کوشست آک ستا کڑزرہ۔