ڈیڈ لاک نا ایسری کن، حکومت و پی ٹی آئی نا نیام اٹ مذاکرات کن مولانا فضل الرحمن مونی

اسلام آباد، حکومت و پی ٹی آئی نا نیام اٹی مذاکرات نا رد اٹ جمعیت علماء اسلام (جے یو آئی) نا سروک مولانا فضل الرحمن ہم مونی بسنے۔ حوال آتا رِد اٹ حکومت و تحریکِ انصاف نا نیام اٹی مذاکراتی کاریم تیٹی ودی مروک آ ڈیڈلاک نا چٹفنگ کن مولانا فضل الرحمن مونی بسنے۔ حوال آتا رِد اٹ پاکستان تحریکِ انصاف و حکومت ہڑتوم آک مولانا فضل الرحمن ءِ خیرخواہ جوڑ کننگ آ تیار ءُ۔ حوال آتا رِد اٹ حکومت و اپوزیشن مولانا فضل الرحمن آن خیرخواہی نا کڑد ادا کننگ نا باضابطہ خواست کرینو۔ حوال آتا رد اٹ مولانا فضل الرحمن خیرخواہ مننگ کن فریقین آتے تینا بنداوی شڑت آتیان معلومدار کرینے۔ او پاش وڑ اٹ پارینے کہ اول او جاچ ہلیک کہ ہڑتوم آ فریق آک ویل انا ایسری ٹی اخس سنجیدہ ءُ و فریق آتا ورندی تا جاچ ہلنگ آن پد او خیرخواہی نا کڑد ادا کننگ یا کپننگ نا فیصلہ کیک۔ حوال آتا رِد اٹ اگہ فریق آک بنداوی باندات آتیا امنا کیر تو مولانا فضل الرحمن تینا کڑد ءِ ادا کیک۔ حوال آتا رِد اٹ مولانا پی ٹی آئی و حکومتی ڈَل آتتون اوڑدہی تا وخت آ فریق آتے تسلی ترسا پارے کہ سنجیدہ و سِخت اٹ کروک کوشست آن داسہ ہم کسر کشنگ مننگ کیک۔ او سلاہ تس کہ اگہ ہڑتوم آ فریق آک اسہ ایلو نا موقف ءِ منر تو نیامی کسر اس کشنگ مریک۔ حوال آتا رِد اٹ مولانا فضل الرحمن پارت کرے کہ اگہ ڈیڈلاک برجا سلیس و لانگ مارچ نا برخلاف واکداری نا کاریم اٹ اتنگا تو ہچ اس بچپرو۔ حوال آتا رد اٹ مولانا فضل الرحمن نا گرین سگنل آن پد وزیراعظم و مولانا نا نیام اٹی اوڑدہی نا ہم گمان ءِ۔