بلوچستان پاکستان نا زرگزرانی شونداری کن اہم کڑد ادا کننگ نا بود تخک،قائم مقام چیئرمین سینیٹ سیدال خان ناصر

کوئٹہ، قائم مقام چیئرمین سینیٹ سیدال خان ناصر وزیراعلیٰ بلوچستان سرفراز بگٹی تون اوڑدہی کرے۔ اوڑدہی ٹی ملک انا جم سیاسی و زرگزرانی حالیت، خاص وڑ اٹ بلوچستان اٹی امن ایمنی‘ سیکورٹی، زرگزرانی شونداری‘ السی ریلیف، صوبہ نا شونداری گرج و السی آسودہی تون تعلقدار باندات آ جم گپ وتران کننگا۔ اوڑدہی ٹی بلوچستان اٹی شونداری وشونہالی کن صوبائی حکومت نا کنڈ آن کروک گام گیج، امن و ایمنی نا حالیت اٹی گچینی‘ الس ءِ ریلیف نا فراوانی و جتا شونداری ڈٹ آتیا ہم گپ و تران مس۔ قائم مقام چیئرمین سینیٹ سیدال خان ناصر پارے کہ بلوچستان ملک نا اسہ اہم و ایلوفتیان پدتموک صوبہ اسے‘ دا سوب آن صوبہ نا مدامگی شونداری‘ شونہالی و السی آسودہی ساڑی حکومت نا اولیت آتیٹی اوار ءِ۔ او پارے کہ بلوچستان نا الس لائخ‘ خواری کش و کسبی لائخی تیان شُپ ءِ وخت اس کہ صوبہ قدرتی وسیلہ و معدنی کوڑی تیان ہم پر ءِ۔ او پارے کہ بلوچستان نا قدرتی وسیلہ غاتے موثر، شفاف و گچین وڑ اٹ کاریم اٹ اتسا صوبہ نا الس نا زرگزرانی و راجی شونداری و شونہالی ءِ پک کننگ مریک‘ گرج دا ہیت اناءِ کہ وسیلہ غاتیان فائدہ ہرفسا ہندی آبادی ءِ شونداری نا عمل اٹی زیات آن زیات بشخندار کننگے۔ سیدال خان ناصر پارے کہ بلوچستان اٹی امن و ایمنی نا گچینی کن ساڑی حکومت عسکری سرکڑدہ غاتا کمک اٹ بھرمی گام گیج کننگ اٹی ءِ۔ امن و سوگوی شونداری وشونہالی نا بنداو ءِ و او وخت مُر اف ہراتم بلوچستان اٹی مدامگی امن تون اوار شونداری و شونہالی نا پوسکن آ وارخواہیک ودی مریرہ و دہشت گردی چٹک۔ قائم مقام چیئرمین سینیٹ پارے کہ بلوچستان پاکستان نا زرگزرانی شونداری و آخبت اٹی اہم کڑد ادا کننگ نا پورو بود تخک۔ پاک چین اقتصادی راہداری (CPEC) و گوادر بیرہ بلوچستان آخا بلکہ مچ آ پاکستان کن زرگزرانی شونداری نا اہم بنجا پک مننگ کیرہ۔ دا ڈٹ آتیان پورو فائدہ ہرفنگ کن سیاسی تعلقداری تیان ایڑتر مرسا قومی و صوبائی فائدہ غاتے ٹی اسیجائی کوشست کروئی تمک‘ او پارے کہ بلوچستان ءِ ملک انا ایلو شون ہلوک علاقہ غاتا بریبر اتنگ کن بنجائی و صوبائی حکومت آتے، سیاسی سرکڑدہ و کل تعلقدار ادارہ غاتے اوار مرسا کاریم کروئی تمک۔ او پارے کہ بلوچستان نا شونداری اصل اٹ پاکستان نا شونداری ءِ و اسہ پرامن، شونہال و شون ہلوک بلوچستان ملک انا روشنا آخبت نا ضمانت مننگ کیک۔