جمہوری قدر و پارلیمانی نظام نا بابت آگاہی وخت انا اہم ءُ گرج اسے،گورنر بلوچستان جعفر خان مندوخیل

کوئٹہ، گورنر بلوچستان جعفر خان مندوخیل تون یوتھ لیڈرز پارلیمنٹ نا ڈل عصمت اللہ نا کماشی ٹی اوڑدہی کرے۔ اوڑدہی ٹی ورناتے پارلیمانی باندات‘ جمہوری عمل و پالیسی سازی آن درستی راستی کرفنگ تون اوار صوبہ ٹی ورناتیکن گچین پلیٹ فارم جوڑ کننگ و اودے پین فعال جوڑ کننگ آ جم گپ وتران کننگا۔ ڈل گورنر بلوچستان ءِ یوتھ لیڈرز پارلیمنٹ نا تنظیمی پنجر و مسخت آتیان معلومدار کرے‘ ڈل انا رد اٹ یوتھ لیڈر پارلیمنٹ نا پنجر پاکستان نا گچین مروک پارلیمنٹ نا دروشم آ ٹہیفنگانے ہرانا مسخت ورناتے پارلیمانی وڑوڈول‘ کانود سازی، شرہ و جمہوری ادارہ غاتا کاریم آن عملی وڑ اٹ آگاہ کننگ ءِ۔ دا وخت آ ہیت وگپ کرسا گورنر بلوچستان پارے کہ ورناک ملک انا نہادی مڈی ءُ و اوفتے فیصلہ سازی، جمہوری قدر و پارلیمانی نظام نا بابت آگاہی فراوان کننگ وخت انا اہم ءُ گرج اسے۔ او پارے کہ ورناتے سیاسی و راجی باندات آتے ٹی مثبت و تعمیری مکالمہ نا وارخواہی فراوان کننگے تاکہ او آخبت اٹی زموار شاری و سوبر ءُ کماشی نا کڑد ءِ ادا کننگ کیر۔ گورنر یوتھ لیڈرز پارلیمنٹ ءِ پارت کرے کہ مچ آ بلوچستان اٹی دا پلیٹ فارم ءِ پین فعال و متحرک جوڑ کننگے و اونا کاریمی دنگ ءِ صوبہ نا جتا ضلع غاتسکان تالان کننگے‘ او ورناتیٹی سرکڑدہی‘ پٹ وپولی‘ مکالمہ، تنقیدی سوچ و ویل ایسر کننگ نا لائخی تے شون تننگ کن ہیلکاری پروگرام، شرہ‘ موک سیشن و مطالعاتی سرجز آتا بست وبند کننگ آ زور شاغا۔ گورنر بلوچستان جعفر خان مندوخیل پارے کہ ورناتے بلوچستان نا تعلیمی، زرگزرانی، راجی و شونداری ویل آتیا تینا سلاہ تے پیش کننگ و پالیسی سازی نا عمل ءِ پہہ مننگ نا وارخواہیک فراوان کننگر۔ یوتھ لیڈرز پارلیمنٹ ورناتے جتا بشخ آتتون تعلقدار ویل آتیا شرہ‘ سلاہ تا تیاری و اجتماعی وڑ اٹ ایسری پٹ و پول کننگ نا مشق فراوان کننگ کیک۔ گورنر بلوچستان پارے کہ بلوچستان نا ورناک تخلیقی لائخی تیان شُپ ءُ، گرج دا ہیت اناءِ کہ اوفتے جوان راہشونی‘ ہیلکاری و المی وارخواہیک فراوان کننگر۔ او یوتھ لیڈرز پارلیمنٹ نا سرجز آتیٹی تعلیمی ادارہ، ورناتا تنظیم و سول سوسائٹی ءِ ہم اوار کننگ نا گرج آ زور شاغا۔ ڈل گورنر بلوچستان ءِ یوتھ لیڈرز پارلیمنٹ نا آخبت نا سرجز و صوبہ ٹی اونا نیٹ ورک ءِ ودفنگ نا لائحہ عمل آن ہم معلومدار کرے۔