ہژدمی ترمیم نا مسخت آتے دوئی کننگ اٹ سرسہبی دوئی متو،احسن اقبال

اسلام آباد، بنجائی وزیر ڈٹ بندی احسن اقبال پارینے کہ ننے معرکہِ حق انا وڑ اٹ معرکہِ شونداری ءِ ہم دوئی کروئی ءِ، نن کیہی وار شونداری ڈٹ ٹہیفین، ولے سیاسی چک وتاڑ پالیسی تا ریسہ ءِ زہمی کرے‘ ہژدمی ترمیم نا مسخت راجی بشخ آتیٹی گچین اتنگ ئس، ولے واکداریک شیفکو کہول اسکان گدریفنگ مفننگ آن درکار بھرم دوئی مننگ کتو۔ بنجائی وزیرِ ڈٹ بندی احسن اقبال ”اڑان پاکستان“ نا رد اٹ یازدہ قومی زرگزرانی مشن تیان ہفتمیکو مشن، انسانی وسیلہ‘ و چاہنداری نا شون تننگ نا دیوان نا کماشی ءِ کرے۔ دیوان آن تران کرسا احسن اقبال پارے کہ نن کیہی وار شونداری ڈٹ ٹہیفین، ولے سیاسی چک وتاڑ پالیسی تا ریسہ ءِ زہمی کرے، پاکستان 2047ء اٹی آزادی نا سد سال پورو مننگ آ ہراڑے سلوک مریک اینو ننا مون آ دا فیصلہ کروک سوج اسے‘ ننے معرکہِ حق انا وڑ اٹ معرکہِ شونداری ءِ ہم دوئی کروئی ءِ، پاکستان ءِ شونداری نا کسر آ مستی اتنگ کن پالیسی تا ریسہ و سیاسی سوگوی المی ءِ۔ احسن اقبال پارے کہ ہژدمی ترمیم نا مسخت راجی بشخ آتیٹی گچینی اتنگ ئس، ولے واکداریک شیفکو کہول اسکان گدریفنگ مفننگ آن درکار بھرم دوئی مننگ کتو، داسہ بیرہ ڈٹ ٹہیفنگ نا وخت اف، ڈٹ آتیا گچین عملدرآمد ءِ پک کروئی تمک، ضلع نا کہول آ واکدار محکمہ جوڑ کروئی تمک تاکہ الس ءِ بنداوی آسراتیک اوفتا درگہ غا دوئی مننگ کیر۔ اسہ صوبائی سیکرٹری اس مچ آ صوبہ نا ویل آتے گچین وڑ اٹ ایسر کننگ کپک، واکداری تے ہندی حکومت آتسکان گدریفوئی تمک، الس ءِ درگہ غا آسراتی تا فراوانی کن انتظامی اصلاحات اتوئی تمک، پاکستان نا خواندگی نا کچ 63 درسد ءِ، دا کہول انا خواندگی کچ اتون نن درکار رفتار اٹ شون ہلنگ کپنہ۔ او پارے کہ تعلیم، جانجوڑی‘ کنشت، سفا انگا دیر و آبادی نا کچ ءِ قومی ہلہلہ ئی اولیت گوندنگ نا گرج ءِ‘ ودوک آ آبادی پاکستان کن اسہ بھلو چیلنج اسےِ۔