زرگزرانی سوگوی آن پد مدامگی شونداری نا کنڈ آ راہی روان اُن،بنجائی وزیر خزانہ

اسلام آباد، وزیر خزانہ سینیٹر محمد اورنگزیب پارینے کہ پاکستان تدوک آ دونیم سال اٹی زرگزرانی سوگوی نا دوئی کننگ اٹی نمان پیشرفت کرینے و داسہ ملک ءِ کھپ آ تالان وختی ودکی نا جاگہ مدامگی و زموارانہ زرگزرانی شونداری نا کسر آ مستی ہنوئی تمک۔ برجا مالی سال اٹ زرگزران نا ردوم کچ 4 درسد آن زیات مننگ نا گمان ارے‘ وخت اس کہ حکومت ٹیکس، توانائی، سرکاری ادارہ، نجکاری و السی مالیات اٹی ساختی اصلاحات آتے برجا تخک۔ وزیرِ خزانہ پاکستان مائیکروفنانس نیٹ ورک نا دہمیکو سالانہ مائیکروفنانس کانفرنس آن ورچوئل تران کرسا پارے کہ زرگزرانی سوگوی، مدامگی شونداری‘ ساختی اصلاحات، واپاری و زرکاری‘ پوسکن آ زرگزران و مالی آسراتی اسکان رسینگ حکومت نا شش اہم اولیت ءُ۔ محمد اورنگزیب پارے کہ پاکستان نا ہڑتوم آ تاوان ہرافک بڑزکو کہول آ جی ڈی پی نا کساس 12.5 درسد اسکان سر مسوسر، تدوک آ مالی سال انا اخیر اٹ کم مرسا 2.6 درسد مسر۔ ملک انا زرکوڑی 21.4 ارب ڈالر نا تاریخی بڑزکو کہول آ سر مسنے ہرافک کساس مسہ تُو انا درآمد کن بس ءُ۔ او پارے کہ اپریل 2025ء آن پاکستان نا خودمختار کریڈٹ ریٹنگ اٹی مسہ وار گچینی بس،خت اس کہ 3 ارب ڈالر نا یورو بانڈ انا سرسہب جاری کننگ آن پاکستان جہانی زرکاری منڈی تیٹی دوارہ ہنا۔ او پارے کہ ایشیا، نیامی دے ٹک، یورپ و امریکہ نا زرکار آتا یورو بانڈ اٹی پورو بشخ ہلنگ پاکستان آ جہانی زرکار آتا پت انا درشانی ءِ۔ وزیرِ خزانہ پارے کہ پاکستان نا زرگزران مسہ سال مست نزوری نا گواچی ئس، ولے تدوک آ مالی سال اٹی زرگزران 3.7 درسد ودا و برجا مالی سال اٹی 4 درسد آن زیات شون ہلنگ نا گمان ارے‘ زرگزرانی سوگوی ءِ مدامگی بنداو آ سوگو کننگ المی ءِ تاکہ ملک مدامگی زرگزرانی سرجز و ودوک و تموک آ زرگزرانی چکر تیان پیش تمنگ کے۔ او پارے کہ حکومت زرگزرانی سرجز آتیٹی نجی بشخ انا کڑد ءِ پین ودفنگ کن سنبرینگوک ءِ۔