اسیجائی کوشست آتیٹ ملکی زرگزران ءِ تینا نت تیا سلفنگ کن کاریم کروئی تمک،وزیراعظم شہباز شریف

اسلام آباد، وزیراعظم شہباز شریف اسہ وار ولدا اپوزیشن ءِ مذاکرات نا سلہ خلسا پارینے کہ پی ٹی آئی نا سرکڑدہ غاتے پاوہ کہ او ہوش کیر‘ جوان سجفر‘ دھرنا و لانگ مارچ نا سیاست ءِ الر‘ حکومت مذاکرات اٹی تولنگ کن تیار ءِ‘ دا خیال آتا درشانی ءِ او کشمیر چوک انڈر پاس نا بنداو ءِ تخنگ نا دود آن تران کرسا کرے۔ او پارے کہ کشمیر چوک انا بھلن کننگ نارد اٹ انڈر پاس نا ساڑی بنداو ءِ تخنگانے، دا خوشی نا ہیت اسے کہ وزیرِداخلہ محسن نقوی دا پروجیکٹ ءِ اسہ تُو اٹ پورو کننگ نا پڑو کرینے، ہراڑکن اودے خراجِ تحسین پیش کینہ‘ او پارے کہ کشمیر چوک انا پن کشمیر نا پن آ تخوک ءِ‘ انشاء اللہ اسہ دے اس برو کہ ہندا شاہراہ سری نگر اسکان کاہک و کشمیری الس آجوئی اٹ دا شاہراہ غا سفر کیک‘ او پارے کہ روڈ‘ پول و انڈر پاس تفنگ نا مسخت الس ءِ گچین و آب اٹو سفری آسراتی فراوان کرسا اوفتا وخت ءِ بچفنگ و اوفتے ملک انا تعمیر و شونداری ٹی پین وخت تننگ نا لائخ جوڑ کننگ ءِ‘ او پارے کہ اسہ کنڈآ ملک انا تعمیر و شونداری کن کاریم برجا ءِ و ارٹمیکو کنڈآ بدبختی اٹ دھرنا و لانگ مارچ نا سیاست کننگ انگ ءِ‘ ہرا ملکی زرگزران کن بھسکاری نا سوب ءِ‘ او پارے کہ مسلم لیگ (ن) و پیپلز پارٹی اوار مرسا کریر کہ پی ٹی آئی نا لیڈرشپ ءِ بامعنی و مسختی نا مذاکرات نا کنڈ آ اتنگے، دھرنا تا سیاست ءِ چٹفنگے و کل اوار تولسا تین پہ تینی ہیت و گپ اٹ ویل آتے ایسر کیر‘ ارا دے بھاز جوان مذاکرات ہم مس اومیت ئس کہ مذاکرات آن مثبت بھرم بریک ولے پی ٹی آئی نا سرکڑدہ غاک اناگت دا مذاکرات ءِ لتاڑ کریر و مذاکرات آتے بے سہب کرفیر‘ بدبختی اٹ دا کل گڈیکو ساہت آتے ٹی مس‘ پی ٹی آئی مذاکرات ءِ خراب ایسر نا کنڈآ ایس‘ داٹی ہچ شک اس اف کہ دھرنا تا سیاست نا اولیکو شست زرگزران مریک‘ قوم و ملک انا نسخان مریک‘ دونیم سال انا اسیجائی کوشست آتتون ملکی زرگزران ءِ تینا نت تیا سلفین، زرگزرانی ٹک آک گچین مسر، برآمد، زرراہی تس و پیداوار اٹی ودکی مس‘ داسہ دھرنا و لانگ مارچ آن ملکی زرگزران ءِ نسخان رسیفنگ و شونداری نا پہیہ ءِ جام کننگ ملک دشمنی اف تو پین انت اسے‘ او پارے کہ نن ہر وڑ اٹ ملکی زرگزران نا گچینی نا سفر ءِ برجا تخنگ کن کوشست کننگ اٹی اُن‘ پی ٹی آئی نا سرکڑدہ غاتے پاوہ کہ او ہوش کیر و جوان سجفر‘ دھرنا و لانگ مارچ انا سیاست ءِ الر‘ حکومت مذاکرات اٹی تولنگ کن داسہ ہم تیار ءِ او پارے کہ دھرنا و لانگ مارچ آن مروک بھسکاری آن مچ آ قوم ءِ سماءِ‘ بیرہ نمے سما تمپننگ ءِ تو دا بھلو است ہسونی نا ہیت اسے‘ او پارے کہ دھرنا و لانگ مارچ نا جاگہ غا ملک ءِ مستی دننگ اٹ کڑد ادا کننگے و وطنِ عزیز ءِ عظیم جوڑ کننگے۔