اے این ایف نا کارروائی، کیچ، پیشن ملک اسمگل کننگوک 3825 کلوگرام منشیات دوئی

کوئٹہ، اینٹی نارکوٹکس فورس نا کارندہ غاک 56 کروڑ روپئی آن زیات مالیت نا منشیات اسمگل کننگ نا کوشست ءِ بے سہب کرسا کیچ انا علاقہ جوسک آن دوئی کرے ولے دزگیری مننگ کتو۔ ترجمان اے این ایف نا رِد اٹ اے این ایف نا کارندہ غاتے اودیم حوال رسینگاسس کہ نادرست اسمگلر آک منشیات نا بھلو کھیپ اس کوڑی کرسا اسمگل کننگ خوارہ‘ ہراڑا کیچ انا علاقہ جوسک اٹی اسہ کمپاؤنڈ اسے اٹی چھاپہ خلاس ڈکوک منشیات چرس 2454 کلوگرام، میتھ ایمفیٹامائن 1363 (آئس)، ہیروئن 8 کلوگرام جم وڑ اٹ برآمد مروک منشیات 3825 کلوگرام ءِ۔ حوالی نا رد اٹ دوئی کروک منشیات نا جم مالیت 56 کروڑ روپئی آن زیات مریک‘ بنائی جاست پاست نا رد اٹ منشیات اوغانستان آن پاکستان اسمگل کننگاسس ہرادے اوکان پد دریاب نا کسر اٹ پیشن نا ملک اسمگل کروئی ئس۔ ولے دا کارروائی ٹی کس اس دزگیر مننگ کتو‘ دوبہ دار آتے دزگیر کننگ کن کارروائی تا بناءِ کننگانے۔ دا کارروائی آن اسہ وار ولدا راستکی پاش مسنے کہ اوغانستان اٹی کاریم کروک جہانی منشیات اسمگلنگ نیٹ ورک مخصوص جغرافیائی ہند انا سوب آن پاکستان نا ڈغار و دریابی کسر تے ایلو ملک اسکان منشیات سر کننگ کن راہداری نا وڑ اٹ کاریم اٹ اتنگ نا کوشست کننگ اٹی ءِ‘ اے این ایف نا کارندہ غاک اسہ تُو مست انٹیلی جنس بیسڈ معلومداری آ کولمبو ایئرپورٹ آ کنٹینر آن 463 کلوگرام میتھ ایمفیٹامائن (آئس) دوئی کرسا نیٹ ورک نا اوغان بھلا ءِ اے این ایف دزگیر کرے ہراڑان اوغانستان آن فعال منظم منشیات نیٹ ورک آتا ڈیہہی و جہانی تعلقداریک پین پک مسر۔