اے ڈی سی نا ڈسٹرکٹ ہیڈ کوارٹر ہسپتال گنداواہ نا دورہ

جھل مگسی، ڈپٹی کمشنر جھل مگسی سید رحمت اللہ شاہ نا پارت نارد اٹ ایڈیشنل ڈپٹی کمشنر جھل مگسی عبدالغفور جمالی ڈسٹرکٹ ہیڈ کوارٹر ہسپتال گنداواہ نا دورہ ءِ کرے، ہراڑے او ہسپتال اٹی دوئی دارو، ناجوڑ آتے فراوان کروک طبی آسراتی و دارو تا اسٹاک نا خوڑتی اٹ جاچ ءِ ہلک۔ دا وخت آ سینئر میڈیکل آفیسر ڈاکٹر عبدالرزاق آرائیں ایڈیشنل ڈپٹی کمشنر ءِ ہسپتال اٹی ساڑی دارو، اوفتا اسٹاک نا ساڑی حالیت، ناجوڑ آتے دارو تا فراوانی و درمان تون تعلقدار باندات آتیا بریفنگ تس۔ او پارے کہ ہسپتال آ بروک آ ناجوڑ آتے دوئی وسیلہ غاتا رد اٹ طبی آسراتی و المی دارو تا فراوانی پک کننگ انگ ءِ۔ ایڈیشنل ڈپٹی کمشنر عبدالغفور جمالی ہسپتال نا چندی بشخ آتا ہم جاچ ءِ ہلک و تعلقدار افسر و طبی کارندہ غاتیان ناجوڑ آتے فراوان کروک آسراتی تا بابت معلومداری دوئی کرے۔