ناجوڑ آتے طبی آسراتی تا فراوانی ٹی ہچ ءُ ڈیوالئی اس سگپنہ،ڈاکٹر نقیب نیازی

لورالائی، ایم ایس ٹیچنگ ہسپتال لورالائی ڈاکٹر نقیب اللہ نیازی ننکان ہسپتال نا جتا بشخ آتا دورہ ءِ کرے و ہسپتال اٹی برجا طبی آسراتی، سفائی وکارندہ غاتا حاضری نا جم جاچ ءِ ہلک۔ دورہ نا وخت آ ایم ایس وارڈ آتیٹی درمان مروک ناجوڑ آتتون اوڑدہی کرے، اوفتا خیر و عافیت نا ارفے و اوفتے فراوان کروک طبی آسراتی تا بابت معلومداری دوئی کرے۔ او ناجوڑ و اوفتا خاہوت ٓتتون ہم آسراتی تا بابت حوال کرے و تعلقدار کارندہ ءِ ناجوڑ آتا گچین درمان ءِ پک کننگ نا پارت کرے۔ ڈاکٹر نقیب اللہ نیازی ایمرجنسی بشخ انا ہم دورہ ءِ کرے، ہراڑے ساڑی ناجوڑ آتتون اوڑدہی کرے و طبی آسراتی تا جاچ ءِ ہلک۔ دا وخت آ او ڈاکٹر، پیرامیڈیکس و ایلو کل کارندہ غاتے پارت کرے کہ ناجوڑ آتے وخت آ و گچین طبی آسراتی تا فراوانی ٹی ہچ وڑ انا ڈیوالئی سگنگ مفک۔ ایم ایس پارے کہ ہسپتال آ بروک ہر ناجوڑ ننا اولیکو اولیت ءِ، دا سوب آن کل ملازم آک تینا زمواری تے پورو زمواری، سِخت و کسبی وڑ اٹی سر ایتر۔ او پیدوار کرے کہ کل کارندہ غاک تینا ڈیوٹی آ وخت آ ساڑی مریر و غیر حاضری ءِ ہچ حالیت اٹی سگنگ مفک۔ او سفائی نا کارندہ غاتے ہم پارت کرے کہ ہسپتال نا کل بشخ، وارڈ، ایمرجنسی و ایلو ہند آتیا سفائی نا گچین بست و بند آتے پک کننگے تاکہ ناجوڑ آتے سفا، رکھوک و گچین چاگڑد فراوان کننگ مرے۔ ایم ایس ڈاکٹر نقیب اللہ نیازی پارے کہ ٹیچنگ ہسپتال لورالائی ٹی ناجوڑ آتے گچین طبی آسراتی تا فراوانی، کارندہ غاتا حاضری، سفائی و ہسپتال نا نظم و ضبط آ خصوصی چکار تننگ انگ ءِ، و دا رد اٹ ڈیوالئی وبے پرواہی سگنگ مفک۔