سائنس و ٹیکنالوجی ہی شون ہروک آ قوم تا بنداوی واک ءُ، مولانا ہدایت الرحمان

گوادر، رکن صوبائی اسمبلی گوادر مولانا ہدایت الرحمن بلوچ پارینے کہ سائنس و ٹیکنالوجی ہی شون ہروک آ قوم تا بنداوی واک ءُ، ورناک جدید علوم و ٹیکنالوجی ٹی مہارت دوئی کرسا ملک و علاقہ نا شونی اٹی تینا کڑد ءِ ادا کیر۔ او دا ہیت گوادر میرین ڈرائیو آ ورلڈ اسپیس ویک 2026 نا چرجوئی اٹی گوادر گرامر اسکول نا زیرِ اہتمام اڈ ہلوک آ اسپیس واک نا گڈسر اٹی شرکاء آن تران کرسا کہے؛ او پارے کہ سائنس و ٹیکنالوجی کائنات نا ہمو راز آتے پٹ و پول کننگ نا وسیلہ ءُ ہرافتے اللہ تعالیٰ بندغ کن ڈھکوک تخانے۔ اینو ہمو قوم آک شونی نا منزل آتے طے کننگ اٹی ءُ ہرافک علم، سائنس و ٹیکنالوجی ٹی مہارت دوئی کرینو۔ او نودربر آتیا زور شاغا کہ او محنت و لگن اٹ تعلیم دوئی کیر، جدید علوم خوانیر و تینا صلاحیت آتے ملک و علاقہ نا شونی کن کاریم اٹ اتیر؛ ورلڈ اسپیس ویک نا تقاریب تا بنا گوادر گرامر اسکول نا نودربر و استاد تا کنڈ آن اڈ ہلوک آ اسپیس واک آن مس، ہراٹی نودربر آک خلائی موضوعات آ مبنی پوسٹرز، پلے کارڈز و جتا کاسٹیومز نا وسیلہ اٹ تینا تخلیقی صلاحیت تا درشانی ءِ کریر۔ واک اٹی لمہ باوہ، شاری و جتا بشخ آتتون تعلق تخوک آ شخصیت آک بھی بھلو کچ اسے ٹی بشخ ہلتسا نودربر تا حوصلہ افزائی ءِ کریر۔ واک نا گڈسر آئی لو گوادر پوائنٹ آ مس، ہراڑے اسکول نا سربراہ خدابخش ہاشم، پرنسپل ناصر رحیم سہرابی و نودربر آک مہلب مولابخش، عاصمہ اللہ بخش و ہونک ناصر بھی تران کریر۔ نظامت نا فرائض فیصل علی سر انجام تسخت اس کہ نصیب اللہ تلاوتِ کلامِ پاک نا سعادت حاصل کرے؛ تقریب اٹی ناگمان بلوچ، فیض نگوری، آر سی ڈی کونسل گوادر نا مجید عبداللہ، بہرام بلوچ، عبداللہ عثمان، معروف ٹرانسپورٹر نواز بلوچ، پرنسپل مجید خدابخش سمیت ایلو شخصیت آک بشخ ہلکر۔