دیکی سیم آ دہشت گرد آتا رکھوک ہند آتا شاہدیک اریر،طلال چوہدری

اسلام آباد، وزیر مملکت داخلہ پاکستان اٹی ودوک آ بے امنی و دہشت گردی نا رد اٹ اہم دعویٰ کرسا پارینے کہ ہمسائے ملک آن کانود آن چَپ وڑ اٹ اسمگل کروک سلہہ غاتے پاکستان اٹی جتا جتا ٹولیک بے امنی تالان کننگ کن کاریم اٹ اتنگ اٹی ءُ؛ او پارے کہ دہشت گردی و بمب دھماکہ غاتا سرجز آتا باندات آتے ٹی جاست پاسات نا دنگ ءِ تالان کننگانے‘ پین بندغ مسنو وخت اس کہ پوسکن آ فون کال تے ہم پرسجو نا بشخ جوڑ کننگانے‘ پریس کانفرنس کرسا وزیرِ مملکت داخلہ پارے کہ دیکی سیم انا خڑک آ دہشت گرد آتا رکھوک و ہیلکاری ہند آک اریر‘ ہرافتیان پاکستان اٹی بے سوگوی ودی کننگ نا کوشست کننگ انگ ءِ او پارے کہ پراکسی تا کمک اٹ پاکستان ءِ نزور کننگ کن زرکاری ءِ ودفنگانے او دُوبہ خلک کہ اِرا سال مست شکست تون مون تروک آ ہمسائے ملک اوکان پد پراکسی تیا تینا زرکاری ٹی ودکی کرینے و دیکی سیم آ ساڑی ہیلکاری ورکھوک ہند آتے کاریم اٹ اتنگ انگ ءِ‘ وزیرِ مملکت پارے کہ بدبختی اٹ اسلام و جہاد نا پن آ مالی فائدہ نا گوازی کننگ انگ ءِ و منٹ اس زر تا بدل اٹ دا نعرہ غاتے کاریم اٹ اتسا پاکستان ءِ نزور کننگ نا کوشست کننگ اٹی ءُ؛ وزیرِ مملکت داخلہ جوائنٹ ایکشن کمیٹی کشمیر و پاکستان تحریکِ انصاف نا برانزی وڑوڈول نا اسٹی ناکنڈآ ہم اشارہ کرے او پارے کہ جے اے سی پی ٹی آئی نا لانگ مارچ نا دے برانز نا کال تسوسس، ولے البتہ آزاد کشمیر نا الس برانز و ہڑتال نا دا توار ءِ مسترد کرے‘ او پارے کہ کشمیری الس گچین کاری تا بائیکاٹ تون تعلقدار دشمن نا توار ءِ ہم مسترد کریر و بھلو کچ اسے ٹی گچین کاری تا عمل اٹی بشخ اتسا دا کوشست ءِ بے سہب کریر۔؛ وزیرِ مملکت نا رِد اٹ دشمن آزاد کشمیر نا حالیت آتے مقبوضہ کشمیر نا حالیت آتتون گنڈنگ نا کوشست کننگ ئس، ولے الس گچین کاری تا عمل اٹی بشخ ہلسا دا بیانیہ ءِ امنا کتو‘ وزیرِ مملکت خیبرپختونخوا حکومت آ ہم تنقید کرسا دوبہ خلک کہ صوبائی حکومت سیاسی فائدہ کن صوبہ ٹی برجا بے امنی ءِ کاریم اٹ اتنگ اٹی ءِ۔