سرکاری وام‘ کشاری انکم ٹیکس نا ہلنگ نا عمل اٹ ترندی اتنگے،ڈپٹی کمشنر مستونگ

مستونگ، ڈپٹی کمشنر مستونگ بہرام سلیم نا کماشی ٹی ڈسٹرکٹ کوآرڈینیشن کمیٹی نا اہم ءُ دیوان اس سرکاری وام تا ہلنگ ءِ ترند کننگ نا رد اٹ اڈہلک‘ ہراٹی ضلع مستونگ نا جم سیکورٹی حالیت، جتاجتا سرکاری محکمہ تا کارکڑد، الس ءِ بنداوی آسراتی تا فراوانی و ایلو اہم باندات آتا جم جاچ ءِ ہلنگا۔ دیوان اٹی کیہی اہم فیصلہ ہم کننگا۔ دیوان اٹی ایڈیشنل ڈپٹی کمشنر، اسسٹنٹ کمشنر دشت، اسسٹنٹ کمشنر مستونگ، اسسٹنٹ کمشنر کردگاپ، ڈی ایس پی سٹی، ڈسٹرکٹ ہیلتھ آفیسر، ایکسین بی اینڈ آر (بلڈنگز)، ایکسین روڈز، ڈپٹی ڈائریکٹر زرعی انجینئرنگ، ایم ایم ڈی، میڈیکل سپرنٹنڈنٹ ڈی ایچ کیو ہسپتال مستونگ، ڈپٹی ڈائریکٹر کشت وکشار‘ پی پی ایچ آئی، تحصیلدار مستونگ، محکمہ مال انا کارندہ‘ ڈپٹی کمشنر دفتر نا نمائندہ غاتتون اوار جتاجتا محکمہ تا افسر آک بشخ ہلکر۔ دیوان اٹ محکمہ غاتا افسر آک تینا تینا محکمہ تا کارکڑد، برجا ڈٹ و السی آسراتی تا فراوانی کن ہرفوک گام گیج آتا بابت ڈپٹی کمشنر ءِ بریفنگ تسر۔ دا وخت آ ڈپٹی کمشنر مستونگ بہرام سلیم مال انا کارندہ و محکمہ کشت وکشار نا افسر آتے پارت کرے کہ سرکاری وام وخاص وڑ اٹ کشاری انکم ٹیکس نا ہلنگ نا عمل اٹ پین ترندی اتنگے و پن کروک ہدف آتا دوئی کننگ ءِ امر کہ مرے پک کننگے۔ او پارے کہ سرکاری وام تا ہلنگ اٹ ہچ ڈیوالئی سگنگ مفک۔ کل باندات آتے قاعدہ و ضابطہ نا رِد اٹ سر تننگے تاکہ سرکاری کٹیا ٹی ودکی و وام تا ہلنگ ءِ پک کننگ مرے۔ او پیدوار کرے کہ دا رد اٹ اسہ کارندہ سے نا ہم بے پرواہی مون آبس تو اونا برخلاف سخت کانودی و محکمہ ئی کارروائی کننگک۔ دیوان آن تران کرسا ڈپٹی کمشنر بہرام سلیم پارے کہ الس نا جان و مال انا رکھ و اوفتے بنداوی آسراتی تا فراوانی ضلعی انتظامیہ و تعلقدار سرکاری محکمہ تا بنداوی زمواری ءِ۔ حکومت بلوچستان نا کنڈ آن مستونگ نا شاری و مر انگا علاقہ غاتیٹی الس ءِ جانجوڑی‘ تعلیم و ایلو بنداوی آسراتی تے فراوان کننگ کن وس انا کچ آ گام گیج کننگ انگ ءِ۔