وزیراعلیٰ بلوچستان تون علاقائی معتبر تا وفد نا اوڑدہی، شونی ڈٹ آتیا ہیت و تران

کوئٹہ، وزیراعلیٰ بلوچستان میر سرفراز بگٹی تون چارشنبے نا دے زاہد علی بگٹی نا کماشی ٹی علاقائی متبر آتا ڈل اس اوڑدہی کرے؛ اوڑدہی ٹی علاقائی حالیت، ایسٹ و ویسٹ ڈیرہ بگٹی ٹی برجا شونداری ڈٹ و الس نا آسودہی تون تعلقدار گام گیج آتیا جم گپ وتران کننگا۔ اوڑدہی ٹی ڈیرہ بگٹی نا جتا جتا علاقہ غاتیٹی برجا شونداری ڈٹ‘ روزگار، الس ءِ بنداوی آسراتی تا فراوانی و علاقہ نا جم حالیت تون تعلقدار باندات آتیا گپ وتران کننگا۔ ڈل علاقہ ٹی برجا شونداری سرجز و السی آسودہی نا گام گیج آتا باندت آن وزیراعلیٰ بلوچستانءِ معلومدار کرے‘ وزیراعلیٰ میر سرفراز بگٹی پارے کہ حکومت بلوچستان الس نا آسودہی و بنداوی آسراتی تا فراوانی کن عملی گام گیج کننگ اٹی ءِ او پارے کہ صوبہ نا کل علاقہ غاتیٹی شونداری عمل ءِ بھرمی وڑ اٹ مستی دننگ انگ ءِ تاکہ الس ءِ آسراتی تا فراوانی پک جوڑ کننگ مرے‘ اوڑدہی ٹی تین پہ تینی استخواہی تا ایلو باندات آتیا ہم گپ وتران کننگا۔