بینک آتا کنڈآن وام تا فراوانی نا عمل اٹ ترندی اتنگے،گورنر بلوچستان

کوئٹہ، گورنر بلوچستان جعفر خان مندوخیل اسٹیٹ بینک آف پاکستان و غٹ کمرشل بینک آتا ریجنل ہیڈ آتا میٹنگ ءِ گورنر ہاؤس کوئٹہ اٹی بٹنگا، ہراٹی وزیراعظم پاکستان نا ”اپنا گھر پروگرام” نا رداٹ الس ءِ فراوان کننگوک آ ہاؤسنگ فنانس، وام تا دوئی کننگ نا وڑوڈول و ایلو ضلع غاتسکان ودفنگ و دا اسکیم آن زیات آن زیات بندغ آتے فائدہ رسفنگ نا بابت سرجمی اٹ گپ وتران کننگا۔ اوڑدہی نا وخت آ گورنر بلوچستان پارے کہ بینک آتا کنڈآن وام تا فراوانی نا عمل اٹ بلوچستان نا الس آ ایلو صوبہ غاتا بابت بریبرخراج آتا اطلاق ءِ پک کننگے۔ دا بابت فنانس، ریونیو و ایلو تعلقدار غٹ محکمہ غاک تینا فعال کڑد ءِ ادا کرسا تینا کارکڑد ءِ پین گچین و جوان کیر۔ دا باندات اٹی بے پرواہی و ڈیوالئی ءِ سگنگ پننگک۔ گورنر مندوخیل پارے کہ اپنا گھر پروگرام کم و نیامی کٹیا والا بندغ آتے کن اسہ اہم آسراتی اسے۔ حکومت نا کنڈآن رعایتی ہاؤسنگ فنانس نا مسخت شاری تے اُراہلنگ، تینا پلاٹ آ اُراجوڑ کننگ یا اُرانا تفنگ کن مالی کمک فراوان کننگ ءِ۔ گورنر مندوخیل پارے کہ بلوچستان اٹ بھاز انگا بندغ بینکنگ سسٹم، وام تا وڑوڈول، درکار دستاویزات و درخواست جمع کرفنگ نا ریسہ غاتیان نابلدءُ۔ گورنر مندوخیل بینک آتے پارت کرے کہ السی شعور و آگہی نا پبی مہم چلیفر و پروگرام نا معلومداری تے آسان زبان اٹ الس اسکان سرکننگے۔ بینک آتا شاخ آتیان بیدس ایلو اہم ہند آتیا پینا فلیکس خلنگے تانکہ شاری تے درخواست نا وڑوڈول و تعلقدار بینک آتتون رابطہ نا بابت ساف معلومداری دو برے۔ گورنر بلوچستان پارے کہ بلوچستان اٹ دا اسکیم نا رداٹ وام دوئی کروک آ بندغ آتا کچ بھاز کم ءِ۔ دا بابت او بینک آتا ریجنل سروک آتے پارت کرے کہ وام تا فراوانی نا عمل اٹ ترندی اتنگے و آن لائن آسراتی ءِ ہم آسان جوڑ کننگے تانکہ مرانگا علاقہ غاتاشاریک ہم سہی راہشونی دوئی کننگ کیر۔ گورنر مندوخیل پارے کہ نن حکومت بلوچستان نا کہول آ کل تعلقدار محکمہ غاتے ہم زیات فعال و متحرک جوڑ کینہ تانکہ ڈغار، دستاویز و ایلو تعلقدار باندات آتیٹی گمانی اڑاند آتے کم کننگ مرے۔ او پارت کرے کہ شش ہفتہ غان پد دُوارہ دیوان اڈ تننگے ہراٹی غٹ تعلقدار بینک تینا تینا ہند آتیٹی پروگرام نا پیش رفت، ملوک آ درخواست، منظور مروک و فراوان کننگوک وام، السی آگاہی نا گام گیج و مون تروک آ اڑاند آتا بابت تینا کارکڑد رپورٹ پیش کیرہ۔