بلوچستان آن ٹرین ہائی جیک کننگ نا کوشست کننگا، ولے حکومت ٹرین سروس ءِ گچین جوڑ کننگ کن گام گیج کرینے

کوئٹہ، جناح پیپلز ٹرین نا بنائی دود کوئٹہ ریلوے اسٹیشن اٹی اڈ ہلک، وزیراعلیٰ بلوچستان میر سرفراز بگٹی و بنجائی وزیرِ ریلوے حنیف عباسی جناح پیپلز ٹرین نا بناءِ کریر۔ اِرا بوگی آ تالان ٹرین اٹی اسہ وخت اٹی 250 آن زیات مسافر سفر کننگ کیرہ و ٹرین سریاب آن کچلاک اسکان کاہک‘ بنائی دود آن تران کرسا وزیراعلیٰ بلوچستان میر سرفراز بگٹی پارے کہ بلوچستان روایات آتا امین ڈغار ءِ و مدام پاکستان نا است آن خڑک مسنے۔ بلوچستان آن ٹرین ہائی جیک کننگ نا کوشست کننگا، ولے حکومت ٹرین سروس ءِ گچین جوڑ کننگ کن گام گیج کرینے‘ ننا کوشست ءِ کہ الس ءِ گچین سفر نا آسراتیک فراوان کننگر۔ او پارے کہ جناح پیپلز ٹرین نا ڈٹ آ پارلیمانی سیکرٹری ریلوے میر لیاقت لہڑی و مچ آ ٹیم نن و دے خواری کرے‘‘ چین آن ٹرین نا خواہفنگ بھاز سخت وبھلو وخت اسے ٹی پورو مروک ءُ ڈٹ اس ئس، دا سوب آن ساڑی وسیلہ غاتے ٹی الس ءِ سفر نا آسراتی فراوان کننگ کن دا گام گیج کننگانے۔ جناح پیپلز ٹرین آن کوئٹہ نا لس شاری تے دراست فائدہ مریک‘ وزیراعلیٰ پارے کہ بروک آ سال اسکان جناح پیپلز ٹرین نا کچ ءِِ اسٹ آن ودفسا ارٹ کننگک وخت اس کہ آخبت اٹی دا سروس ءِ بوستان آن مستونگ اسکان مستی ودفنگ نا ڈٹ آ ہم سجفنگ انگ ءِ‘ دشمن نا کل سازش آتے بے سہب کینہ و بلوچستان ءِ شونداری نا کسر آ روان کینہ۔ میر سرفراز بگٹی پارے کہ نیم جان و پیر انگا بندغ تیکن جناح پیپلز ٹرین اٹی سفر مفت مریک‘ او پارے کہ مذاکرات کن ریاست نا ملوک درگہ غاک مدام ملوک ءُ و بلوچستان اٹی الس ءِ گچین سفر نا آسراتی تا فراوانی حکومت نا اولیت آتیٹی اوار ءِ۔ دود آن بنجائی وزیرِ ریلوے حنیف عباسی و ایلو کمامدار آک ہم تران کریر، وخت اس کہ بنائی دود اٹ ریلوے کمامدار، صوبائی وزیرک، پارلیمانی باسک و ایلو تعلقدار شخصیت آک ساڑی ئسر۔