آپریشنل ریسرچ ءِ جانجوڑی نظام نا بشخ جوڑ کننگ نا گرج ءِ،مجیب الرحمن

کوئٹہ، صوبائی وزیراعلیٰ بلوچستان میر سرفراز بگٹی نا وژن نا رِد اٹ سیکرٹری جانجوڑی بلوچستان مجیب الرحمن بلوچستان اٹی جانجوڑی نا نظام ءِ پین بھرمی، سوگو و شاہدی آ تالان جوڑ کننگ نا ارادگی نا درشانی ءِ کرسا پارینے کہ جانجوڑی نا بشخ اٹ مون تروک ویل آتا نشاندہی، اوفتا سائنسی آزموندہ و ایسری کن آپریشنل ریسرچ ءِ صوبائی نظامِ جانجوڑی نا باقاعدہ بشخ جوڑ کننگ وخت نا اہم ءُ گرج اسے‘ او پارے کہ پٹ وپول و شاہدی نا بنداو آ کروک فیصلہ غاتیان الس نا جانجوڑی نا خذمت آتا آب ءِ گچین جوڑ کننگ و ساڑی وسیلہ غاتا بھرمی کاریم اٹ اتنگ اٹی کمک رسینگک‘ او دا خیال آتا درشانی ءِ کوئٹہ ٹی (SORT-IT) نا رد اٹ اڈ ہلوک اولیکو تاریخی آپریشنل ریسرچ کورس 2026-27 نا بنائی دود آن تران کرسا کرے‘ سیکرٹری جانجوڑی SORT-IT نا رد اٹ صوبہ ٹی اولیکو وار آپریشنل ریسرچ کورس انا ہند آ اڈ ہلنگ ءِ ستا کڑزوک گوندسا پارے کہ بلوچستان کون آ بھلارقبہ و جتا جغرافیائی حالیت تخوک آ صوبہ ٹی جانجوڑی نا ویل آتا بھرمی ایسری کن ہندی کہول آ پٹ وپول و حساب کتاب نا بنداو آ ڈٹ بندی بھاز اہم ءِ‘او پارے کہ محکمہ جانجوڑی بلوچستان نا کنڈ آن آپریشنل ریسرچ نا شون تننگ کن کروک گام جانجوڑی نابشخ اٹ مدامگی و مثبت بدلی کن کمک ایتک‘ او پارے کہ شاہدی تیان تالان فیصلہ سازی پوسکنوڑ نظامِ جانجوڑی نا بنداوی گرج ءِ‘ آپریشنل ریسرچ نا کمک اٹ جانجوڑی نا بشخ اٹ ساڑی عملی ویل آتا نشاندہی کرسا اوفتا قابلِ عمل و بھرمی ایسری پٹنگ مننگ کیک، ہراڑان جانجوڑی نا آسراتی، خذمت آتا فراوانی و ناجوڑ آتا ہننگ نا آب اٹ گچینی اتنگ مریک۔