اصلاحات نا کمک اٹ زرگزران ءِ سوگو بنداو تننگ انگ ءِ،سینیٹر محمد اورنگزیب

اسلام آباد، بنجائی وزیر خزانہ و محصولات سینیٹر محمد اورنگزیب جہانی مالیاتی فنڈ انا مشن سے شنبے نادے آ بنائی اوڑدہی کرے۔ جہانی مالیاتی فنڈ انا مشن پاکستان کن توسیعی فنڈ آسراتی (ای ایف ایف) نا چارمیکو و ریزسٹنس اینڈ سسٹین ایبلٹی آسراتی (آر ایس ایف) نا مسٹ میکو جاچ اکن پاکستان نا دورہ غا ٹی ءِ، آئی ایم ایف مشن نا کماشی ءِ آئیوا پیٹرووا کننگ ءِ۔ اوڑدہی ٹی پاکستان و آئی ایم ایف نا نیام اٹ برجاپروگرام نا رداٹ مروک آ پیش رفت، پالیسی گام گیج و بروک آ جاچ آتا بابت امور آ گپ و تران کننگا۔ بنائی ورچوئل گپ و تران اٹی وزیر مملکت خزانہ و محصولات بلال اظہر کیانی، چیئرمین ایف بی آر راشد محمود لنگڑیال و وزارت خزانہ نا سینئر کمامدارآک ہم ساڑی ئسر۔ پاکستان داوخت آ جہانی مالیاتی فنڈ (آئی ایم ایف) نا توسیعی فنڈ آسراتی و ریزسٹنس اینڈ سسٹین ایبلٹی آسراتی (آر ایس ایف) نا رداٹ پروگرام آ عملدرآمد کننگ ءِ۔ توسیعی فنڈ آسراتی نا بنداوی مسخت پاکستان نا مالیاتی و پیشن نا بشخ آتا پائیداری ءِ گچین جوڑ کننگ، زرگزرانی سوگوی ءِ پین سوگو کننگ و پنجرجاتی اصلاحات نا کمک اٹ زرگزران ءِ سوگو بنداو تیا استوار کننگ ءِ۔ اونا رداٹ مالیاتی نظم و ضبط، خراج نا بشخ اٹ اصلاحات، توانائی نا بشخ اٹ گچینی و سرکاری ادارہ غاتون اوار چندی بشخ آتیٹی اصلاحات آ چکار کننگ انگ ءِ۔ ریزسٹنس اینڈ سسٹین ایبلٹی آسراتی مریس مدی پنجرجاتی ویل، خاص کر موسمیاتی بدلی و قدرتی آفت آتا خطرہ غاتون مون تننگ کن پاکستان نا زرگزران ءِ زیات لچکدار جوڑ کننگ نا بابت ءِ۔ دا پروگرام نا رداٹ موسمیاتی پالیسی، توانائی، قدرتی وسیلہ و مالیاتی و ادارہ جاتی پنجراٹی ہمو اصلاحات آ تیازور شاغنگ انگ ءِ ہرا پاکستان نا موسمیاتی و زرگزرانی لچک اٹ ودکی مرے۔ جہانی مالیاتی فنڈ تینا مسٹمیکو جاچ انا ایسری آ تینا بیان اٹ گونداسس کہ سوگو پالیسی تیا گچین عملدرآمد نا نتیجہ ٹی پاکستان نا زرگزرانی بحالی نا عمل برجاءِ، ہراڑآنزر کار و کاروباری حلقہ غاتا پت اٹ ودکی مسنے و زرگزران ءِ چندی وڑنا دھچکہ غاتا مقابلہ ءِ کننگ اٹی کمک رسینگانے۔