سلہہ ہرفوک آتتون مذاکرات مننگ کپک،میر سرفراز بگٹی

لاہور /، وزیراعلیٰ بلوچستان میر سرفراز بگٹی پارینے کہ صوبہ نا بنداوی ویل پسماندگی اف بلکہ غلط بیانیہ ہے۔ راستکی و گمان اٹی فرق ءِ پہہ مننگ نا گرج ءِ‘ بدبختی اٹ ساڑی دور اٹی بلوچستان نا راست انگا تاریخ ءِ بیان کننگپک، پسماندگی پاکستان نا ہر صوبہ ٹی ارے‘ ولے دا دا بنداو آ اسہ جاگہ اس ہم ریاست نا برخلاف سلہہ ہرفنگ یا ریاست ءِ چٹفنگ نا ہیت مفک۔ بلوچستان ءِ پرغنگ نا تغ خنوک آتا تغ ہچ گہس پورو مننگ کپک و او بے سہب مریرہ۔ آئین نا آرٹیکل 5 ریاست تون بے شڑت آن وفاداری کننگ نا پاہک‘ ورنا چین و ریاست نا نیام اٹی مُری ءِ کم کننگ کن ہر کہول آ تینا ورناتے بننگ اٹی اُن، دا خیال آتا درشانی ءِ او دوشنبے نا دے نیشنل اسکول آف پبلک پالیسی ٹی شریدار آتیان تران کرسا کرے۔ وزیراعلیٰ بلوچستان پارے کہ سیاسی بندغ آتتون مذاکرات کن مدام تیار اُن، ولے سلہہ ہرفوک آتتون مذاکرات مننگ کپک۔ او پارے کہ بلوچستان نا ویل ءِ راستکی و تاریخی رد اٹ پہہ مننگ نا گرج ءِ کہ انتئے کہ غلط بیانیہ نا بنداو آ صوبہ نا حالیت آتا راست وڑ اٹ جاچ ہلنگ مفک۔ میر سرفراز بگٹی پارے کہ بلوچستان نا پاکستان تون الحاق نابابت ہم تاریخی راستکی تے راست انگا رد اٹ ہننگ نا گرج ءِ‘ خان آف قلات تینا کتاب اٹی تینٹ نوشتہ کرینے کہ بلوچستان نا الحاق اونا رضامندی اٹ مس‘ او پارے کہ بلوچستان نا تاریخ ءِ پہہ مننگ کن تاریخی راستکی و اصل مآخذ نا خواننگ المی ءِ‘ وزیراعلیٰ بلوچستان بیوروکریسی نا کنڈ آن صوبہ ٹی خذمت سر تننگ تون تعلقدار بھاز گڑتی تا ذکر ءِ کرسا پارے کہ پنجاب آن بھاز آ بیوروکریٹ آک بلوچستان آ بننگ ءِ دوست توپسہ‘ او پارے کہ ہرا وخت اسکان افسر آک گراؤنڈ آ برسا حالیت آتا جاچ ءِ ہلپس اوفتے ڈغاری راستکی تا بابت امر معلومداری دوئی مریک؟ میر سرفراز بگٹی پارے کہ بلوچستان نا ویل و ہندی الس نا گرج آتے پہہ مننگ کن ڈغاری راستکی تیان معلومدار مننگ المی ءِ‘ پالیسی سازی و انتظامی فیصلہ کننگ اٹی ہندی حالیت، السی گرج و حقی ویل آتے مون آ تخوئی تمک۔