پولیس الس نا جان و مال انا رکھ و امن کن اولیکو دستہ نا کڑد ادا کننگ اٹی ہے،آئی جی پولیس بلوچستان

کوئٹہ، انسپکٹر جنرل آف پولیس بلوچستان محمد طاہر پارینے کہ پولیس اسہ منظم و نظم و ضبط نا پابند فورس اسے ہرا الس نا جان و مال نا رکھ، امن و دہشت گردی و ڈوہدار آتا برخلاف بھرمی کارروائی تیٹی اولیکو دستہ نا کڑد ءِ ادا کننگ اٹی ءِ‘زمواری تے سرتننگ نا وخت آ پولیس افسر و ورناتا تروک قربانیک گیرام دننگ مفسہ و دا قربانی تے مدام قدر و شرف تننگک۔ دا ہیت آتے او یک شنبے نا دے پولیس لائن اٹی اڈ ہلوک پولیس دربار آن تران کرسا کرے۔ دا وخت آ ڈی آئی جی کوئٹہ عمران شوکت، ڈی آئی جی ہیڈکوارٹر طاہر علاؤ الدین کاسی، ڈپٹی کمانڈنٹ بلوچستان کانسٹیبلری شیلا قریشی تون اوار ایلو افسر و کارندہ غاک ہم ساڑی ئسر۔ او پارے کہ پولیسنگ نا نظام ءِ پوسکن آ خواست آتتون ہم گرنچ و پین جوڑ کننگ کن پوسکنوڑ ازباب‘ وسیلہ و آسراتی تے کاریم اٹ اتنگ انگ ءِ‘وخت اس کہ پولیس افسر و ورناتا جنگی واکداری ٹی ودکی کننگ کن پوسکنوڑ ہیلکاری نا فراوانی ءِ ہم خاص اہمیت تننگ انگ ءِ۔ او پارے کہ پوسکنوڑ ازباب سیف سٹی تون اوار ساڑی انفارمیشن اینڈ ٹیکنالوجی نا بشخ آن فائدہ ہرفنگانے و دا بابت کارندہ غاتے خاص ہیلکاری ہم تننگانے۔ آئی جی پولیس بلوچستان تران کرسا پارے کہ داڑان مست اڈ ہلوک پولیس دربار نا وخت آ افسر و ورناتا ویل و گرج آتا جم جاچ ءِ ہلنگاسس و دا وخت آ اوفتا آسودہی‘ آسراتی تا فراوانی، پوسکنوڑ پولیسنگ کن المی ازباب ہرافتے ٹی 200 نا کچ آرمڈ گاڈی، 800 آن زیات موٹرسائیکل، پوسکنوڑ و بھرمی سلہہ تننگ نا ریسہ برجاءِ و آب اٹنگا ہیلکاری نا بابت کروک ڈٹ آک پوروی مننگ نا ریسہ ٹی ءُ۔ محمد طاہر پارے کہ اللہ تعالیٰ نا شکر ءِ کہ پولیس دربار اٹی افسر و ورناتتون کروک قول تے پورو کننگ نا عمل پدریسہ برجاءِ۔