کسب اٹی گچینی و پوسکنوڑ چاہنداری تا دوئی کننگ آ چکار المی ءِ،وزیرخزانہ محمد اورنگزیب

اسلام آباد، بنجائی وزیرِ خزانہ و محصولات، سینیٹر محمد اورنگزیب اقوام متحدہ نا جنرل اسمبلی نا 81 می سالانہ دیوان نا وخت آ نیویارک اٹ ڈیجیٹلائزیشن، ایوی ایشن، ریفائنری نا جدید کاری و ریکوڈک ڈٹ انا بابت جہانی شریدار آتون اہم گپ و تران کرے۔ وزارتِ خزانہ نا رداٹ وزیرِ خزانہ مچ آ دے برجارہینگوک آ اوڑدہی تا چرجوئی ٹی ڈیجیٹل کوآپریشن آرگنائزیشن نا بڑزکو کہول انا وزارتی مکالمہ ٹی بشخ ہلک ہراڑے او ڈیجیٹلائزیشن ءِ پاکستان نا زرگزرانی سوگوی آن پائیدار اقتصادی شونداری نا کنڈ آگدریفنگ نا اسہ اہم بشخ اس گوندا۔ او ڈیجیٹل پبلک انفراسٹرکچر و کیش لیس ادائیگی تا مون آ دننگ نا بابت پارے کہ رابطہ کاری تون اوار کسب اٹی گچینی و پوسکن آ مہارت آتا دوئی کننگ آ ہم چکار کننگ المی ءِ تانکہ فری لانسر و ڈیجیٹل بشخ اتون وابستہ بندغ آک بڑزکو مہارت نا حامل خذمت آتا کنڈ آہِننگ کیر۔ ورچوئل اثاثہ غاتا بھلو کچ اسے آ کاریم اٹ اتنگ نا حوالہ ءِ ترسا سینیٹر محمد اورنگزیب کانود سازی، چاروکی و لائسنسنگ نا بابت پاکستان نا برجاکوشست آتا ذکر ءِ کرے و کرپٹو کرنسی آن مست اوفتے عملی کاریم اٹ اتنگ آ زور شاغا، ہرافتے ٹی کم خڑچ و آسرات زرراہی تس تون اوار اوار سرکاری وام و رئیل اسٹیٹ نا گمانی ٹوکنائزیشن اوار ءِ۔ او ڈیجیٹل زرگزران اٹ سرسہب آزموندہ غاتا ہل و تس و زرکاری نا مون آ دننگ کن ڈی سی او نا باسک ملک آتا نیام اٹ خڑکی کمکاری نا گرج آ زور شاغا۔ وزیرِ خزانہ امریکی ایکسپورٹ امپورٹ بینک نا چیئرمین جان جوانووچ تون ہم اوڑدہی کرے، ہراٹی پاکستان انٹرنیشنل ایئرلائنز (پی آئی اے) کن جہاز آتا ہلنگ، ریفائنریز نا جدید کاری و ریکوڈک کانڑ کنی نا ڈٹ آتے کن مالی کمک نا فراوانی آ گپ و تران کننگا۔