سیاست و صحافت اسٹ ایلو نا کمککار بشخ ءُ،شیخ جعفرخان مندوخیل

کوئٹہ، گورنر بلوچستان جعفرخان مندوخیل پارینے کہ سیاست و صحافت اسٹ ایلو نا کمککار بشخ ءُ وخت اس کہ سوگو و زموار میڈیا راج اٹی شاری تے اوفتا حق و زمواری تا احساس ترفنگ اٹ اہم کڑدار ادا کیک۔ نن مدام پرنٹ، الیکٹرانک و سوشل میڈیا تون تعلقدار میڈیا پرسن تے شرف ایتنہ و کیہی دہائی تیان صحافی برادری تون بھاز جوان تعلقداریک مسنو۔ دا خیال آتا درشانی او پاکستان جرنلسٹس ایسوسی ایشن (رجسٹرڈ) بلوچستان نا صدر محمد حنیف جمالی نا کماشی ٹی پی جے اے نا عہدیدار آتیا تالان ڈَل اسے تون اوڑدہی نا وخت آ ہیت وگپ کرسا کرے۔ ڈل اٹی پاکستان جرنلسٹس ایسوسی ایشن نا محمد شاہد مگسی، ہما بلوچ، سمیرا راجپوت، مہوش، فردوس، فریا بتول، مس نورین، مس دنیا، جہانزیب، اکرم، ارون کمار، محمد شہزاد، فیروز جمالی، محمد ظفر جمالی ہم اوار ئس۔ دا وخت آ گورنر بلوچستان پارے کہ میڈیا ریاست نا اسہ بھاز اہم ءُ تمبہ اسے‘ پروفیشنل صحافیک تینا حرفی آب و شرف ءِ برجا تخنگ کن بھلو خواری و بھاز جہد کیرہ۔ او پارے کہ اسہ زموار و آجو صحافت راج اٹی السی ویل آتے پاش کننگ، ادارہ غاتے پرسجو جوڑ کننگ و الس و حکومتی ادارہ غاتا نیام اٹی رابطہ ءِ سوگو کننگ اٹی اہم کڑد ادا کیک۔ گورنر مندوخیل پارے کہ او اولیکو دے آن گورنر ہاؤس نا درگہ غاتے میڈیا پرسن تتون اوار کل الس کن ملوک تخنگانے۔ او پارے کہ صحافی تا ویل و گرج آتے مدام اہمیت تننگانے و اوفتتون ہر وڑ انا کمکاری برجا تخنگک۔ اخیر اٹ گورنر بلوچستان جعفرخان مندوخیل پاکستان جرنلسٹس ایسوسی ایشن نا 12می یومِ تاسیس نا کیک ہم کاٹ کرے۔